«ՀԱՆՈՒՆ ԻՆՁ 8600 ՄԱՐԴ ՀՐԱԺԱՐՎԵԼ Է...»


«Վե°րջ: Ուրիշ լրատվամիջոցի ես մեկ ժամ չէի հատկացնի»,- մեր զրույցն այսպես ամփոփեց Ժողովրդական կուսակցության և ԱԼՄ հոլդինգի ղեկավար Տիգրան ԿԱՐԱՊԵՏՅԱՆԸ: Իսկ մինչ այդ նա հիմնավորել էր իր վերաբերմունքը ընտրություններից հետո ստեղծված իրավիճակի վերաբերյալ: Ստեղծված վիճակի պատճառն, ըստ Տիգրան Կարապետովիչի, միայն Երևանի ավագանու ընտրությունները չեն: Շաղկապված է ամեն ինչ, քաղաքական դաշտն իշխանությունը ձգտեց մաքրել, ու մեծ մասը դուրս եկան խաղից: Ոմանք Հանրային խորհուրդ գնացին, մյուսներն ինչ-որ կոչումների են սպասում: Ընդդիմությունը, որտե՞ղ է հիմա… Այստեղ միտում կա, և իշխանությունը որոշներին կերակրատաշտին մոտեցնելով` մաքրում է դաշտը: Մեզանից էլ էին ուզում մաքրվել, բայց մենք մաքրվող չենք, որովհետև ինքնուրույն ենք, մեզ վրա ազդելու լծակներ չկան: Ինձ էլ մարտի 1-ի հանձնաժողովում առաջարկեցին ընդգրկել, բայց ես հրաժարվեցի: Իշխանությունը պետք է, սակայն սեփական շարքերը մաքրելու մասին նույնպես մտածի, և հենց սա էր պատճառը, որ վերջին ընտրությունները ամենավատը ստացվեցին: - Ձեր կուսակցությունը շա՞տ է տուժել ընտրական անարդարություններից: - Ես դրա մասին չեմ ուզում խոսել, որ չմտածեն, թե սուբյեկտիվ եմ, բայց խնդիրը գործընթացին է վերաբերում: Դիտարկենք միավորներով. «Օրինաց երկիր» կուսակցությունը իջավ քսան անգամ, Դաշնակցությունը իջավ հինգ անգամ: Ես աճեցի, որովհետև Նախագահի ընտրություններում հանրապետությունով մեկ հավաքել էի 10 հազար ձայն, հիմա 8,5 հազար միայն Երևանում եմ հավաքել: Առանց փողի, առանց ոչ մի կոպեկի, առանց հորդորի, առանց ոչ մի բանի: - Հորդո՞ր էլ չենք ունեցել, բայց քարոզարշավ էիք անում: - Չե°մ արել: Քարոզարշավ էլ չեմ արել: Հանդիպումներ մի երկու հատ ունեի և ամենահամեստ` քսան հոգիանոց ցուցակն էի ներկայացրել: Մեկ միլիոն 800 հազար դրամ էլ փող եմ ծախսել. մյուսների համեմամատ` կոպեկներ: Փաստորեն չեմ աշխատել` հույսս կապելով այն բարոյական հատվածի հետ, որը պետք է գար ու քվեարկեր` հոգևոր կապ ունենալով ինձ հետ: Ես չեմ ասում, թե բարոյական մարդիկ միայն իմ օգտին են քվեարկել: Հնարավոր է` բոլոր կուսակցությունների ընտրողների շրջանում այդպիսի մարդիկ եղել են, և դա հույս է ներշնչում: Բացի այդ, եթե ԿԸՀ-ն ընտրողների 52 տոկոսի մասնակցության մասին է խոսում, ուրեմն 20 տոկոսը լցրել են: Այսինքն, ընտրության է գնացել մարդկանց 30-32 տոկոսը: Ուրեմն 70 տոկոսը չեն եկել, և այս մարդկանց տեսանկյունից էլ դա է բարոյական: Չնայած չմասնակցողները մեզ վնաս տվեցին` հոգու մեջ բոյկոտելով ընտրությունները: Իսկ ի՞նչն էին նրանք բոյկոտում. պարզ է` ոչ թե մեզ, այլ անարդար ընտրությունները: Ես էլ եթերում ասում եմ, թե հարգելիներս, դուք մեզ ոհմակի դեմ մեն-մենակ թողեցիք, չեկաք մեզ սատարելու: Հանձնաժողովներում կեղծելու հրահանգ չկար, բայց իրենք մեխանիկորեն կեղծեցին, ծեծկռտուքներն էլ վերևից չէին հրահանգված: - Պարոն Կարապետյան, փաստորեն լավ չստացվեց, այս անգամ էլ Ձեր կուսակցությանը չհաջողվեց անհրաժեշտ տոկոսներ հավաքել: Դուք էլ խոստացել էիք, բայց փողոց դուրս չեկաք: - Նախ և առաջ հարցը կոռեկտ ձևակերպեք: Լավ եղավ, որ չանցանք: Անցնեինք մի տեղ, որտեղ կեղծիքն է գերակշռում, նշանակում է մենք էլ էինք այդ ամենի մեղսակիցը դառնալու: Եթե նույնիսկ անցնեինք, միևնույն է, մանդատները վայր էինք դնելու: - Բայց չէ՞ որ Ձեր ծրագրերը ոչ թե իշխանություններին, այլ Երևանը Ձեր պատկերացրած մայրաքաղաքը դարձնելուն պետք է ծառայեին: - Այո¯… Անկախ ամեն ինչից, մեր տեսակետները շարունակելու ենք հնչեցնել, իսկ մնացածն արդեն իրենց խնդիրն է. իրենք պետք է օգտագործեն, իրենց զինանոցի մեջ ներառեն: Մենք էլ մեր խոսքը տեղ հասցնելու համար միտինգներ արել ենք և էլի կանենք: - Արդյո՞ք հանրահավաքները դրանց կազմակերպիչների ակնկալած օգուտն ապահովում են: - Օգուտ տալիս է, թե չի տալիս… Հասարակության վրա միտինգը պետք է ազդի: Եթե չի ազդում, ուրեմն «պադոշ» հասարակություն ունենք: Արտասահմանում միտինգները քաղաքական գործընթաց են համարում` բոլորովին էլ չմտածելով, թե ինչ հետևանք կունենա այն: Մեզ մոտ ակտիվ մարդիկ են միտինգների գնում: Նրանք, ովքեր անտարբեր են, ինչի՞ պիտի գնան: Հո փող չեն բաժանում… - Տիգրան Կարապետովիչ, Ձեր նախընտրական ծրագիրն ամենածավալունն էր: Եթե ճիշտ եմ հիշում, 120 կետ էր ներառված այդտեղ: Տպավորիչ մի բան էիք ասում, թե երթուղային փոխադրամիջոցների ուղեվարձը 50 դրամի կարելի է իջեցնել, բայց մտավախություն է հնչում, որ 100-ը 150 կարող է դառնալ: - Ամենահեշտ գործն է: Հիմա ենթադրենք, թե ես սնանկանում եմ ու իմ վարորդներին չեմ կարողանում վճարել: Վարորդիս կառաջարկեմ, դիցուք, վեց ժամ կազմակերպության համար վարել մեքենան, իրիկուններն էլ` իր: Այլընտրանք է, չէ՞… Այս դեպքում էլ քաղաքապետարանը կարող է մի հիսուն հատ անվճար ավտոբուս բերել, վարորդի հետ պայմանագիր կնքել ու աշխատել: Եթե մեքենայի տարողունակությունը մեծ է, ուրեմն շահույթն էլ մեծ կլինի: Ռուսաստանում եղած ժամանակ գիտե՞ք ինչքան այլընտրանք եմ առաջարկել: Այնտեղ ընդունվել է, այստեղ չի ընդունվում: - Կոնկրետ օրինակ կբերե՞ք: - Օրինակ, Վոլգա գետի մի ափից մյուսը լաստանավ է գնում, որից օգտվելը կենսաթոշակառուների համար բավական անմատչելի է ու թանկ: Ես խնդրեցի` հանուն Աստծո մի երթուղին անվճար դարձնել, բայց առավոտյան ժամը 7-ին` հողամասերը մշակելու գնացող տարեցների համար… Առաջարկս ընդունվեց, և վաղ առավոտներն այդ երթուղին աշխատում էր ծանրաբեռնվածությամբ: Իսկ մեզ մոտ ժողովրդի համար հենց այնպես ոչինչ չի արվում: Այստեղ ամեն ինչ հաշվում են: - Դե, քանի որ խոսեցիք հաշվելու մասին, դառնանք ընտրություններին ու քաղաքական խնդիրներին: Փաստորեն ունենք արտաքաղաքապետարանական քաղուժեր և իշխանություններ: Ինչպե՞ս եք տեսնում համագործակցության հեռանկարները: - Ես բազմիցս եմ նշել, որ պետք է կազմակերպվի երկխոսություն, կլոր սեղան: Բայց մեր ներուժն իրենց պե՞տք է, մեր խորհուրդն իրենց պե՞տք է: Եթե պետք է, ուրեմն իրենք պետք է դիմեն, եթե ոչ, էլ ինչի՞ մասին է խոսքը: Համաներման մասին ես խոսում եմ ապրիլ ամսից, տեսագրություններն էլ կարող եմ ցույց տալ… Ի վերջո, հաշվի առան, բայց չեն ասում, որ Կարապետյանի առաջարկն է: - Հեռուստաընկերությունում ի՞նչ նոր ծրագրեր ունեք: - Մենք նախատեսում ենք տեղ տալ ազգային, պատմական հաղորդումներին: Մեզ այսօր Եվրոպան կլանում է, բայց մենք նույնիսկ չգիտենք, թե ինչ է Եվրոպան: Դրսի անբարոյականությունը հիմա փաթաթում են մեր օձիքին… Իսկ ո՞վ է մեր դպրոցները փակել. թուրքի Օսման փաշան ու «Օրինաց երկիրն»` իր օպտիմալացմամբ: Ո՞ւմ ցուցումով: Նույն Եվրոպայի: Ուրեմն ազգայինը քիչ է: Հերոսներին, ազատամարտիկներին շքանշան չեն տալիս, ծախված արվեստագետներին են տալիս: Մենք մեր դիրքորոշումները չենք փոխելու: ՀԱԿ-ին երբեք չենք միանա, որքան էլ այսօր մենք հարում ենք նրանց: Իշխանությունը ձգտում է, որ մենք իրենց միանանք: Այդ դեպքում մեկ քաղաքական միավոր էլ արանքից դուրս կգա: Եթե Կոնգրեսին միանանք, իշխանությունը գոհ կլինի. էլի ՀԱԿ-ը կմնա, բայց Կարապետյանը չի լինի, արդեն ՀԱԿ-ի մեջ կլինենք: Մենք երրորդ ուժի դաշտն ենք զբաղեցրել և չենք նահանջելու: Շատերն են ցանկացել իմ տեղն զբաղեցնել, չեն կարողացել ու չեն էլ կարողանա: Խցանի նման դուրս կթռչեն: Ամեն ընտրությունից հետո մտածել են, թե ես կհիասթափվեմ, կնահանջեմ, բայց ես իմ ժողովրդի հետ եմ: Իմ ձայները սուրբ են: Հանուն ինձ 8.600 մարդ հրաժարվել է փողից:

Ա. ՄԱՆՈՒԿՅԱՆ