<<Մարդիկ դարձյալ հիասթափված են>>

ՀԺԿ-ն առաջիկա խորհրդարանական ընտրությունների հետ մեծ հույսեր չի կապում: Պատգամավոր Ստեփան Զաքարյանը համոզված է, որ հասարակությունը շարունակաբար կեղծվող ընտրություններից հիմնավորապես հոգնել է: Այնուամենայնիվ, ըստ ՀԺԿ-ական պատգամավորի, իրենք պատրաստ են նաև միայնակ մասնակցել քվեարկությանը և խորհրդարանի անցնող տարիների գործունեությունից հիմնականում դժգոհ լինելով` նաև վստահ են, որ բոյկոտի դադարեցումը նոր բովանդակություն է հաղորդել Ազգային ժողովին: - Այս ամառը նախորդներից տարբերվում է բնականաբար միայն քաղաքական առումով, քանի որ հաջորդ գարնանը տեղի ունենալիք խորհրդարանական ընտրությունների <<շունչը>> զգացվում է արդեն այսօրվանից: - Նայելով քաղաքական դաշտին` տեսնում ենք, որ կուսակցությունների պահվածքը բազմատիպ է` սկսած ոչինչ չանելուց, վերջացրած ծաղկեփնջեր բաժանելով կամ քարոզարշավի ամենաուղղակի դրսևորումներով ու ընտրողների հետ ավանդական հանդիպումներով: ՀԺԿ-ն այս պահին ավելի շատ մտահոգված է կուսակցական օղակներն ամրապնդելու հարցերով: Կոպիտ ասած` գույքագրում ենք ուզում անել` պարզելու, թե ինչ ունենք և ինչ չունենք: Այս առումով, իհարկե, լուրջ աշխատանքներ կան անելու. պետք է նաև մարդկանց հանդիպել, և ենթադրում եմ, որ դրանք երևի միայն կուսակցականների շրջանով սահմանափակվեն, քանի որ ըստ մեզ` նախընտրական միջոցառումների համար դեռ ժամանակ կգտնվի: Ուրիշները թե ինչ են բաժանում ու ինչքան են բաժանում, դա իրենց գործն է, բայց ես կարծում եմ, որ շտապում են, շուտ են սկսել: - Իսկ գուցե շատ ունեն և ավելի ուշ էլ կբաժանեն: - Այո, կամ սխալվում են կամ էլ այնքան շատ ունեն, որ հետո էլ կկարողանան բաժանել: Այնուամենայնիվ, վերջիններս պետք է հաշվի առնեն, որ չափաբաժինները գնալով պետք է ավելացնեն: - ՀԺԿ-ի մասով նշեցիք, թե փորձում եք ճշտել, թե ինչ ունեք: Ի̉նչ եք պարզել: - Գործընթացը շարունակական է, և գնահատականներն էլ տարբեր են: Պետք է նշեմ, որ իմ տպավորությամբ` մարդիկ դարձյալ հիասթափված են... Այն առումով, որ երկրում ոչինչ չի փոխվում, և քաղաքական ուժերը չեն կարողանում այնպիսի փոփոխությունների հասնել, որ ժողովուրդը դրանք զգա: Բայց եթե հարցին համեմատական կարգով նայենք, ապա այստեղ պետք է ուրախությամբ նշեմ, որ ՀԺԿ-ի դիրքերը չեն թուլացել: Ավելի շատ քաղաքական դաշտն է թուլացել: Եթե մի քանի ընտրություն շարունակաբար կեղծվում է, և ժողովուրդն արդեն չի հավատում, որ իր քվեն տեղ է հասնելու, նա նաև սկսում է չհավատալ քաղաքական ուժերին և համակարգին: - Դուք Ստեփան Դեմիրճյանին համարում էիք <<ազգընտիր նախագահ>>: Ավելի ուշ էլ նա գլխավորեց <<Արդարություն>> ընդդիմադիր դաշինքը: ՀԺԿ-ն ներկայում դաշնակիցներ չի̉ որոնում: - Բազմիցս ենք ասել, որ այդ մասին դեռ վաղ է խոսել, և գտնում եմ, որ աշնանը ավելի հստակ կլինի, թե ով ում հետ է ընտրություն ներին մասնակցելու: Միևնույն ժամանակ` չեմ թաքցնում, որ ՀԺԿ-ն պատրաստ է ընտրություններին միայնակ մասնակցել: ̉ - Եվ ի̉նչ ակնկալիքներ ունեք, ինչքան ձայն կարո̉ղ եք հավաքել: - Դա կախված է նրանից, թե ինչպիսի ընտրություններ կլինեն: - Որքան էլ դժվար լինի պատկերացնել, խոսքն ազատ և արդար ընտրությունների մասին է: - Մենք հարցումներ չենք անցկացրել, և ես իսկապես դժվարանում եմ որևէ կոնկրետ բան ասել: - Իսկ Ձեր կուսակցության բազմահազարանոց բանակից արտահոսք չի̉ եղել դեպի նորաստեղծ քաղաքական ուժեր: - Մեր ժողովուրդն արդեն սովորույթ է դարձրել. երբ մի բան տալիս են, մարդկանց մեծ մասը չի հրաժարվում, բայց դեռ հարց է, թե նրանք ընտրության օրն ինչպես կքվեարկեն: Հետևապես հարկ է նշել, որ ժողովուրդը միշտ էլ արդարացրել է իրեն: Այլ հարց է, որ նրա ձայնը հետո են գողացել ու կեղծել: Եվ զարմանալի է, թե ինչու որոշ քաղաքական ուժեր հույսը ոչ թե կեղծիքների, այլ ընտրակաշառքների վրա էլ են դնում: Ես չեմ կարծում, թե առաջիկա ընտրություններում ինչ-որ բան փոխվելու է: - Արդեն գրեթե հայտնի է, որ Պաշտպանության նախարարը ՀՀԿ-ի հետ է ընտրություններին մասնակցելու: Ի̉նչ կարծիքի եք Ս. Սարգսյանի այս որոշման մասին: - Ես, ճիշտն ասած, կուզենայի, որ այս մասին նախարարն ինքն ասեր, և դա հավանաբար ՀՀԿ համագումարում կհնչի: Այս երկրում ամեն ինչ է հնարավոր, և կոնկրետ հայտարարությունից հետո այդ մասին կխոսենք: - <<Արդարությանը>> կորուստներ սպասվո̉ւմ են: - <<Արդարություն>> դաշինքը որպես այդպիսին այլևս գոյություն չի ունենա, իհարկե, քանի որ դաշինքի շատ անդամներ արդեն հայտարարել են, որ նույն կազմով չեն գնա ընտրությունների: - Իսկ լիազորություններն ավարտող խորհրդարանի գործունեության մասին ի̉նչ կասեք: Դուք և ակտիվորեն բոյկոտել եք ԱԺ աշխատանքները և հակառակը: - Մենք խորհրդարանի գործունեությունը դրական գնահատել չենք կարող և չենք կարծում, թե որևէ մեկը կարող է դրական գնահատել: Բոյկոտը դադարեցնելուց հետո, երբ մենք սկսեցինք կանոնավորապես մասնակցել նիստերին, խորհրդարանն, իհարկե, դրանից մեծապես շահեց: Ազգային ժողովում դրանով բովանդակություն երևաց, և շատ օրենքներ, որոնք ընդունվում էին մեկ րոպեում, արդեն սկսեցին ընդունվել ժամերի, օրերի ընթացքում: