Այլընտրանքային խորհրդարան

Ընտրություններից հետո կուսակցությունները հանդես եկան դրանք գնահատող հայտարարություններով: Սովորաբար խորհրդարան չմտած քաղուժերը հեռանում են ակտիվ քաղաքականությունից` սպասելով հաջորդ ընտրություններին: Ինչո՞վ է զբաղված Դեմոկրատական կուսակցությունը, ի՞նչ ծրագրեր ունի և ինչպե՞ս է մտադիր շարունակել իր գործունեությունը: Այս մասին է զրույցը ՀԴԿ նախագահ Արամ Գասպարի ՍԱՐԳՍՅԱՆԻ հետ:

- Դեմոկրատական կուսակցությունը չի հեռանում քաղաքական ասպարեզից: Այդպիսի մտայնություն երբևիցե չի ունեցել: Կարծում եմ` մենք օբյեկտիվ ենք եղել` ոչ բավարար գնահատելով նախընտրական մեր գործունեությունը: Մենք նաև մեր հայտարարության մեջ, ինչպես քաղաքական այլ ուժեր, ահազանգել ենք, որ իրավիճակը բավական տագնապալի է, ինչն առաջին հերթին պետք է մտահոգի իշխանություն ձևավորող ուժերին: Հակառակ պարագայում կգա ավելի մեծ կաշառքներ տվող, և այդ ուժերը կառերեսվեն իրենց ստեղծած իրողության հետ: Դա կյանքի օրենքն է: Կուսակցությունը գտնում է, որ պետք է շարունակի գործունեությունը` իր սկզբունքներին համապատասխան: Քննարկման արդյունքում մեր կուսակցության նախագահության անդամ Ժասմինա Ղևոնդյանն առաջարկեց ձևավորել հասարակական խորհրդարան: Մենք նկատի ունենք այնպիսի կառույց, որտեղ կձևավորվեն այլընտրանքային օրենքներ:

- Ի՞նչ ասել է` այլընտրանքային օրենքներ:

- Խորհրդարանին ներկայացված և մեր պատկերացումներին չբավարարող օրինագծերին այլընտրանքային նախագծեր պետք է առաջարկենք: Խոսքը կոնկրետ բնագավառների մասին է` և´ տնտեսական զարգացման, և´ սոցիալական... Մենք համամիտ չենք լինի այսօրվա իշխանությունների տնտեսական, սոցիալական քաղաքականությանը: Առավել ևս` անհրաժեշտ ենք գտնում, որ կառուցողական ընդդիմություն լինի նաև խորհրդարանից դուրս: Մենք մեր ծրագրում ներկայացրել ենք լուրջ խնդիրներ ու մեխանիզմներ` գիտենալով, թե ինչպես կարելի է դրանք իրականացնել: Եվ դա կառաջարկենք ձևավորվող կառավարությանը, կառաջարկենք նաև խորհրդարանին:

- Ինչպե՞ս եք առաջարկություններ ներկայացնելու խորհրդարանին, երբ արտախորհրդարանական կուսակցություն լինելով, օրենսդրական նախաձեռնության իրավունք չունեք:

- Ճիշտ եք հարցադրում: Բայց մեր այլընտրանքային օրինագիծը մենք կառաջարկենք իշխող կուսակցություններին. եթե համոզված կլինեն, որ դա ճիշտ է ու անհրաժեշտ, թող իրենք անեն: Իսկ եթե չանեն, մենք միշտ հնարավորություն կունենանք հասարակության հետ այդ հարցերը քննարկել: Ի դեպ, մինչև այդպիսի քայլեր նախաձեռնելը, պատրաստվում ենք հասարակական լսումներ կազմակերպել:

- Ի՞նչ փուլում է այդ այլընտրանքային խորհրդարանի ձևավորումը, այսօր դա ընդամենը ցանկությո՞ւն է, թե՞ որոշակի քայլեր արդեն արվել են:

- Խորհրդարանի ձևավորումն այս օրերին ենք ձեռնարկել: Ուրբաթ օրը կայացած` մեր խորհրդի նիստում արդեն հանձնախմբեր ենք ձևավորել: Հիմքում դեռ միայն կուսակցության անդամներն են, իսկ ժամանակի ընթացքում կհրավիրենք նաև այլ մասնագետների, ովքեր պարտադիր չէ, որ կուսակցության անդամներ լինեն, բայց համամիտ կլինեն մեր գաղափարներին և պատրաստ` մեզ օգնել:

- Ձեր ասածը կամ այն, ինչը ես հասկացա Ձեր բացատրությունից, ինձ հիշեցնում է Հանրապետության նախագահին կից գործող Հանրային խորհուրդը կամ դրա նման մի բան:

- Մենք դա արել ենք մեր ծրագրի իրականացման հիման վրա, մեր կուսակցության հնարավորություններն ենք օգտագործելու առաջին հերթին: Նաև պատրաստվում ենք զբաղվել կոնկրետ օրենսդրական գործունեությամբ` խորհրդարանից դուրս: Այսինքն, ուզում ենք ձևավորել այնպիսի օրենսդրական դաշտ, որը կարող է նաև օգտակար լինել իրական խորհրդարանին` եթե նրանք համամիտ կլինեն մեր մոտեցումներին: Իսկ Հանրային խորհուրդն այդպիսի գործունեությամբ չի զբաղվում: Մենք ընդամենն ուզում ենք կյանքի կոչել մեր կուսակցության ծրագիրը, որը ներկայացրել ենք ժողովրդին: Եվ մեզ հավատացողները մեզանից գործողություն են սպասում: Մենք ունեինք համակարգ փոխելու ծրագիր, և դրա համար քայլեր են անհրաժեշտ: Այդ բոլոր քայլերը կձևավորենք կառավարության որոշման ձևով օրենքի նախագիծ ներկայացնելով:

- Իսկ ի՞նչ եք կարծում, իշխանությունները կդիմե՞ն այնպիսի քայլերի, որոնք կարող են հանգեցնել գոյություն ունեցող համակարգի փոփոխության :

- Կարծում եմ` այս ընտրություններից հետո իշխանությունների գլուխը շատ ավելի է ցավելու, որովհետև ժողովուրդը ոչ թե գաղափարի համար է նրանց ընտրել, այլ շատ ուրիշ հանգամանքներից ելնելով: Համակարգը չփոխելն իրենց խնդիրն է, իսկ համակարգը փոխելու համար քայլեր կատարելն ու հասարակությանը դրան մասնակից դարձնելն ու ակտիվացնելն էլ` մեր խնդիրը: Թե որքանով դա այս պահին կհաջողվի Հայաստանի Դեմոկրատական կուսակցությանը` ժամանակը ցույց կտա: Բայց մենք համոզված ենք, որ դրա պահանջարկը կա: Հինգ տարի հետո երկրի վիճակը շատ ավելի վատ կլինի, եթե անհրաժեշտ փոփոխությունները չկատարվեն:

- Դուք Ձեր այդ գործունեությամբ մտադիր չե՞ք համագործակցել քաղաքական այլ ուժերի հետ:

- Իհարկե: Քաղաքական ցանկացած ուժ, որը ցանկություն կունենա մեզ հետ համագործակցել, մենք միշտ պատրաստ կլինենք: Առավել ևս, որ նախընտրական փուլում բոլոր լիբերալ կուսակցությունները դարձել էին սոցիալիստական. համենայնդեպս, իրենց հռետորաբանությամբ այդ էին ասում: Թե որքանո՞վ նրանք այդպիսին կլինեն, կտեսնենք խորհրդարանում. արդյո՞ք նրանք շարունակելու են սոցիալական այդպիսի հստակ ուղղվածության քաղաքականություն վարել, թե ոչ:

- Անհրաժեշտ համարելով համակարգի փոփոխությունը, Դուք այդ գործում Ձեր կարևոր խնդիրը համարեցիք հասարակությանն ակտիվացնելը: Իսկ դա նշանակում է այսօր ոչ միայն կարևորել քաղաքացիական հասարակության կայացումը, այլև պարզապես այն արդեն կայացած համարել:

- Միանշանակ: Առավելևս` դրա օրինակներն արդեն կան. այս երիտասարդները, ովքեր փրկեցին Թռչկանի ջրվեժը, վերջինն էլ Մաշտոցի այգին էր: Այսինքն, կա արդեն այդպիսի մոտեցում, հասարակության ներսում դրա պահանջարկն առկա է: Դրանից ելնելով, մենք կներկայացնենք մերը: Եթե իշխանությունները մեզ հետ համամիտ կլինեն, շատ ավելի լավ: Մենք ուզում ենք հասարակության ակտիվ մասի հետ սերտորեն համագործակցել, որը հասկանում է, որ յուրաքանչյուրի քաղաքացիական դիրքորոշումից է կախված` կյանքում ինչ-որ բան փոխվելը: