Մարզիր միտքը քո մանկան


Այսպես կարելի է բնութագրել Մաքսիմ ՈՍԿԱՆՅԱՆԻ հեղինակած և պատկերազարդ գրքույկով հայ մայրերին հասցեագրված հանելուկները: Գրքույկի վրա հենց այդպես էլ գրված է` «Հայոց իմաստուն մայրերի և նրանց խելացի երեխաների համար»:

Հանելուկը մարզում է միտքը` այլաբանորեն ճանաչելի դարձնելով շատ երևույթներ, մանկանը շրջապատող իրերն ու առարկաները: Մ. Ոսկանյանի հեղինակած հանելուկները բազմաբնույթ են` ծիսական ըմբռնումներ, բնության ճանաչողություն, ծանոթություն սրբերին ու խաչանշան այրերին... Ահավասիկ.

***Տիրոջ գառներին` խոստում անեզերք,

որ Սուրբ Հարությամբ` կյանք է հավիտյան,

Օրհնություն ու Երգ, մեզ` Հովանի Ձեռք,

Ձի´րք բազմապատիկ, անունը`... (ԶԱՏԻԿ)

***Ծառի խեժ է, սառած խեժ,

եթե դնես կրակին,

անուշ ծխով մի ջրվեժ

կտարածվի քո չորս դին.

նշանակն է աղոթքի: (ԽՈՒՆԿԸ)

***Ձիթապտղի ազնիվ յուղ

խառնած ծաղկանց հյութի հետ,

նրանով է քահանան

կնքում Կյանքովն առհավետ: (ՄՅՈՒՌՈՆԸ)

***Դեմքով դեպի արևելք

կանգնում ենք ու զրուցում,

խոսք ենք խոսում Աստծո հետ,

արդարացման սերն հայցում(ԱՂՈԹՔ)

Մանկանց նաև հանելուկներով կրթել փորձող ծնողներին անշուշտ կհետաքրքիր և «Ութօրեկան մանկանց մկրտության ոսկե բանալին» զրույցը, որը պարզաբանում է, թե ինչու է ութ օրականը մկրտության համար լավագույնը համարվում թե´ հին, թե´ Նոր կտակարաններում.

- ...Իր հանգստյան օրվա ավարտից հետո, այսինքն` ութերորդ օրից է Աստված սկսում Ադամի ու նրա կնոջ, նրանց սերունդների, մարդ արարածի փրկագործությունը: ...Ութերորդ օրը նաև հաջորդ շաբաթվա առաջին օրն է` կիրակին, որ ամբողջությամբ փրկագործության խորհուրդն ունի` մեռելներից հարության խոստմամբ: