Միամիտ մտքերի տեսականի
*Օրենքը գրվում է խախտելու և բացառություններ անելու համար:
*Չգրված օրենքներն ավելի գործուն են:
*Նույնիսկ խախտվող օրենքը դարձյալ օրենք է մնում:
*Օրենք` այս ի՞նչ օրի ենք:
*Կարևորը ստեր հորինելն է. ոչինչ` որ չեն հավատա:
*Սուտն առաջինն է հասնում հրապարակ:
*Երբեմն ճշմարտությունը տեղ է հասնում ստի օգնությամբ:
*Ուրիշներից պահանջում է ճիշտ խոսել, որ ինքը չկրկնի նրանց ստերը:
*Ստի ոտքերը կարճ են, քիթը` երկար:
*Ճիշտ խոսողի գրպանը ծակ է:
*Ճշմարտությունն ասելու համար խելոք կամ հիմար լինելը մեկ է. երկու դեպքում էլ բանի տեղ դնող չկա:
*Փորը կուշտ է, աչքը` սոված:
*Դեմ է կաշառքին, բայց երբ առաջարկում են` ամաչում է մերժել:
*Կարևոր խնդիրը խնդիր չունենալն է:
*Երբ խոսել սովորեց, լսելը թարգեց:
*Անձրևն ու քամին նրան չեն վախեցնում, որովհետև ինքն է եղանակ ստեղծողը:
*Ուրիշի թերությունները գլխից վերև է բարձրացնում, որ ինքը մնա ստվերի տակ:
*Միայն փառքի մեջ խեղդվելն է հաճելի:
*Գիտունը սովորում է, անգետը` ապրում:
*Շատերի համար սողալը թռիչքի նախանշան է:
*Դատարկ խոսքը հաճախ ավելի մեծ կշիռ է ունենում:
*Ով հավատում է` նրան էլ խաբում են:
*Նա միայն խոսող է. լսող է փնտրում:
*Մարդու տեղ դրեցին` դարձավ անմարդկային:
*Շատախոսը ծուլանում է լռել:
*Հիմար մտքերն ավելի շուտ են իրականություն դառնում:
*Ոմանք մտածելու ժամանակ չունեն. ավելի կարևոր գործեր ունեն:
*Ուրիշի մասին լավ բան էր ուզում ասել, իր մասին ստացվեց:
Գուրգեն ԼՈՌԵՑԻ