«Ժառանգությունը» մերժել է երկխոսության առաջարկը


Ապրիլի 28-ի ՀԱԿ-ի հանրահավաքին հաջորդեցին ընդդիմադիր քաղաքական ուժերի` միմյանց հասցեին արված մեղադրանքները: Փաստորեն ջրբաժան առաջացավ ընդդիմության շարքերում: Ընդդիմադիր դաշտում առկա զարգացումների, դրանցում «Ժառանգության» տեղի մասին է հարցազրույցը կուսակցության պատգամավորական խմբակցության անդամ Արմեն ՄԱՐՏԻՐՈՍՅԱՆԻ հետ: - ՀԱԿ-ի առաջնորդը մինչև վերջին հանրահավաքն ասում էր, որ ապրիլի 28-ը կարող է ջրբաժան լինել իշխանությունների և ընդդիմության միջև: Բայց այդ ջրբաժանը կարծես առաջացավ ընդդիմության ներսում: Ինչո՞ւ: - Ընդդիմությունը ոչ թե պառակտված է, այլ միասնական չի գործում: Ընդդիմության բազմաբևեռությունը, բազմակենտրոն լինելը նորմալ երևույթ է: Իսկ տարանջատ ված գործելը բացատրվում է այն հանգամանքով, որ այն տարբեր օրակարգեր և տարբեր գործելաոճ ունի: Այս պահի դրությամբ մենք չունենք միասնական ճակատով գործող ընդդիմություն: Մենք մի քանի անգամ առաջարկել ենք, որ ընդդիմությունը պետք է կարողանա կարևորագույն խնդիրների վերաբերյալ համատեղ օրակարգ մշակել և դրա շրջանակներում համագործակցելով` հասնել որոշակի հաջողությունների: Ցավոք` արձագանք չենք ստացել մեր գործընկերների կողմից, և որոշ դեպքերում էլ եղել է ոչ ճիշտ վերաբերմունք «Ժառանգության» նկատմամբ, ինչը, բնականաբար իր հետքն է թողել ընդդիմադիր դաշտում այսօր առկա գործընթացների վրա: - Հաճախ բարձրաձայնվում է, թե ՀԱԿ-ը փորձում է «Ժառանգությանը» վերցնել իր թևի տակ. այսինքն` կառավարելի դարձնել: Այսպիսի բնութագրումների պայմաններում համագործակցությունը հնարավոր համարո՞ւմ եք: - Մենք և ՀԱԿ-ը բավական երկար ժամանակ համագործակցել ենք փաստահավաք խմբի գործունեության շուրջ: Եվ այդ համագործակցությունը դրական արդյունք ունեցավ: Բայց հետագայում ՀԱԿ-ի մեր գործընկերներն, ամենայն հավանականությամբ, ի դեմս «Ժառանգության» տեսան ոչ թե գործընկերոջ, այլ մրցակցի, և սկսվեց մեր նկատմամբ նրանց ոչ ճիշտ և ոչ համարժեք վերաբերմունքը: Հատկապես իրենց սպասարկող լրատվամիջոցներով ուղղակի ցեխարձակումներն անընդունելի էին և որևէ չափանիշերի մեջ չէին տեղավորվում: -ՀԱԿ-ի առաջնորդը վերջին հանրահավաքում հայտարարեց, որ իշխանությունների հետ երկխոսության դուռն արդեն կիսաբաց է: Դուք ինչպե՞ս եք դրան վերաբերվում և հնարավո՞ր է, որ երկխոսության դուռ բացվի իշխանությունների ու «Ժառանգության» միջև: - Այդպիսի երկխոսության առաջարկ «Ժառանգությունը» մեկ անգամ չի, որ ստացել է: Բայց խոսքն այն երկխոսությանը չի վերաբերում, որի հիմքում ինչ-ինչ պայմանավորվածություններ ու գործարքներ են լինում: Մենք մեր քաղաքականությունը միշտ հրապարակայնության վրա ենք կառուցել և արել ենք այն, ինչ ասել ենք: Մենք բավական նորմալ, քաղաքակիրթ հարաբերությունների մեջ ենք իշխանությունների հետ: Քննադատությունն անձնական վիրավորանքների դաշտ չենք փորձում մտցնել և միայն օբյեկտիվ իրականությունն ենք փորձում ներկայացնել, մեր տեսակետներն արտահայտել, մեր պատկերացումներն ասել հանրությանը: Ես ողջունում եմ ՀԱԿ-իշխանություններ երկխոսությունն այն առումով, որ քաղաքական դաշտում արդեն հստակություն է մտցվում: Պարզապես ցավն այն է, որ այդ երկխոսության արդյունքում հնարավոր է` բազմաթիվ քաղաքացիներ հուսահատվեն, հուսալքվեն, ինչը կարող է անդրադառնալ ընդդիմադիր այլ ուժերի, այդ թվում նաև մեզ վրա: Իսկ հուսահատված քաղաքացիներին շատ դժվար է ապացուցել, որ դու անում ես այն, ինչ ասել ես: ՀԱԿ-ը մինչ այժմ ուրիշ խնդիրներ ու կարգախոսներ է առաջադրել` իշխանության ամբողջական և համակարգային փոփոխություններ: Ինչպես ասում էր Լ. Տեր-Պետրոսյանը` ավազակապետության կազմաքանդում: Ես չեմ կարծում, թե այդ պարագայում հնարավոր կլինի պահանջված համակարգային փոփոխության խնդիրն իրականացնել: - Համակարգային փոփոխությունների պահանջ հայաստանյան ընդդիմությունը դրել է դեռևս 90-ական թվականներից: Այսօր «Ժառանգությունն» ի՞նչ է մտադիր անել այդ ուղղությամբ: - Խորհրդի ընդլայնված նիստում նոր Սահմանադրության մասին շատ հստակ խոսվեց, ինչն ապացուցում է, որ կուսակցությունը ամբողջովին համամիտ է Րաֆֆի Հովհաննիսյանի առաջադրած բարեփոխումների ծրագրին: Այդ երեք կետերն իսկապես բարեփոխումներ իրականացնելուն միտված քայլեր են: Սահմանադրությունն է, որ երկրի ներսում բոլոր գործընթացների հիմքն է հանդիսանում: 95-ին զինված ուժերում ծառայում էի և հիշում եմ` ընտրությունների ժամանակ ուղղահայաց հրահանգով զինվորներին ստիպում էին կողմ քվեարկել «Հանրապետություն» բլոկին ու Սահմանադրությանը: Այսինքն` խաղի այն կանոնները, որ դրվեցին 95-ին, հասարակության կողմից ընդունելի չէին: - Համակարգային փոփոխությունների հարցում «Ժառանգության» դիրքորոշումները շատ նման են ՀՅԴ դիրքորոշումներին: Կարելի՞ է ենթադրել, որ երկու կուսակցությունները կարող են համագործակցության եզրեր գտնել: - Մենք համագործակցության եզրեր ունեցել ենք ՀՅԴ հետ` հայ-թուրքական խնդրի առնչությամբ: ՀՅԴ հետ համատեղ «Ո´չ»-ի շարժումը հիմնադրեցինք: Իսկ Արցախի հարցում մի փոքր տարաձայնություններ կան, բայց մեծ հակասություններ կարծես թե չպետք է լինեն: -Հարցս ընտրություններում միասնաբար հանդես գալու մասին է նաև: - Հիմա վաղ է այդ մասին խոսել: Մի փոքր էլ բարդ է, որովհետև Դաշնակցությունը մինչև հիմա ընտրություններին միշտ առանձին է մասնակցել: Իսկ թե ինչպիսին կլինեն խորհրդարանի ընտրությունները, կարծում եմ` քաղաքական զարգացումները ցույց կտան. չէի ցանկանա որևէ կանխատեսում անել: Ընդամենը կասեմ, որ «Ժառանգութ յունն» իր արժանի ներկայացվածությունն այնտեղ կունենա: Ես նկատի ունեմ ժողովրդի տված քվեն և ոչ թե այն, ինչը արձանագրություններում առկա է լինում:

Զրուցեց Արթուր ԴՈԽՈԼՅԱՆԸ