ԳՈՒՐԳԵՆ ԼՈՌԵՑԻ
Լոռվա կատակներ `կանանց տոնին
*
- Սոֆիկ, էդ փոքր տորթը ո՞ր մեկիդ,- հարցնում է հարևանուհին:
- Ախչի, էրեխեքին կքնացնենք ու մարդուս հետ կուտենք:
- Բա ո՞նց կուլ կգնա, բկներիդ կկանգնի:
- Ախչի, ուտիլ տենք, ուժեղանանք, որ նրանց պահենք, է˜...
*
Սեթոյի խոտը ծխահամ էր, էշը չէր ուտում, ուրիշի վրա էր ուզում ծախել:
Նախշուն ձալոն առնողին ասում է.
- Վի, ադա, ըսկի մեր էշը չկերավ, ձեր կովը ո՞նց տի ուտիլ...
*
- Վարսո, որ գան կովին առնելու` երկու պտուկը կկթես, երկուսը կթողնես,- ապսպրում է ամուսինը:
Կինը չորսն էլ կթում է: Առնողը գալիս է և ասում.
- Սա Սաղաթելի տունն ա՞:
- Հա, քե մատաղ:
- Կովին կարելի ա՞ տեսնել:
- Հա, քե մատաղ:
- Կովիդ տեսքը լավ ա, բայց լա՞վ ա կթվում:
- Չէ, քե մատաղ, չորս պտուկն էլ կթել եմ, համա ֆորթին բան չի հասել:
*
- Վալոդ, տանը մի մուկ կա,- վախեցած ասում է կինը:
- Ի՞նչ անեմ, թող իրա հըմար ապրի, էլի...
*
Սիրուշ ձալոն գնաց հարևանուհուց մի բան խնդրելու, բայց սուրճ խմեց, դեսից-դենից խոսեց ու մոռացավ, թե ինչի համար էր եկել: Ստիպված հարցրեց.
- Գեղեցիկ ջան, կարող ա դու իմանաս, թե ինչ տեի ուզի քեզանից:
*
- Ապո, էկեք խմենք գեղեցիկ սեռի կենացը:
- Այտա, էդ գեղեցիկ սեռը ովքե՞ր են,- հարցնում է Վարշամը:
- Կանայք:
- Այտա, սխալվում եք, գեղեցիկ սեռը տղամարդիկ են. ոչ քսվում են, ոչ դուխավատ ըլում, բայց ավելի սիրուն ենք: Բա որ քսվեի՞նք...
*
- Տղա ջան, էս պուճուր մատանին ի՞նչ գնանոց ա:
- 100 հազար դրամ:
- Վահ, էսքան պուճուր բանը բա էսքան թանկ կըլի՞,- զարմացավ Վարսենիկ ձալոն:
*
- Վարսենիկ ձալո, լավ է, չէ՞, որ լոռեցիք միամիտ են,- հարցրեց մի միամիտ լոռեցի:
- Այտա, որ քու կնիկը միամիտ-միամիտ գնա ուրիշի ծոցը մտնի, բա դա լա՞վ ա...