ՍՈՍ ՍԱՐԳՍՅԱՆԻ ՎՃՌԱԿԱՆՈՒԹՅՈՒՆԸ
Ականավոր հայ դերասան, ԽՍՀՄ ժողովրդական արտիստ Սոս Սարգսյանը, ով միշտ կանգնած է եղել ղարաբաղյան խնդրի ակունքների մոտ, այս օրերին մեծ զայրույթ ու ցավ է ապրում: Խոսելով վերջին իրադարձությունների մասին, նա ասել է.
- Այն, ինչ պետք է արվի` անմիջապես պետք է ընդունել Ղարաբաղի անկախությունը, որ սկսվի նաև այդ գործընթացն աշխարհով մեկ: Որովհետև պարզ էր, ու հիմա աշխարհին էլ պարզ դարձավ, որ հայերն Ադրբեջանի հետ մի պետության մեջ ապրել չեն կարող: Այսինքն` պետք է սկսել այդ գործընթացը. սկզբում պետք է մեր կառավարությունն ընդունի Ղարաբաղի անկախությունը և հետո, եթե մեր Արտաքին գործերի նախարարությունն ընդունակ է, ապա աշխարհով մեկ լրջորեն զբաղվի այդ խնդրով: Դա էլ կլինի մեր հզոր հարվածը Ալիևին:
Նշենք, որ Սոս Սարգսյանի այս կարծիքը կիսում են արվեստի ու գրականության շատ գործիչներ, ովքեր օրերս հանդես են եկել համատեղ հայտարարությամբ:
Բազմաթիվ ռուս բանաստեղծներ հայ ընթերցողին ճանաչելի են դարձել Լևոն ԲԼԲՈՒԼՅԱՆԻ բարձրարվեստ թարգմանությունների շնորհիվ: Այս անգամ ներկայացնում ենք շարք` Վլադիմիր ԲՈՅԱՐԻՆՈՎԻ պոեզիայից:
Վլադիմիր Բոյարինովը ռուսական պոեզիայի այսօրվա երևելի անուններից է, բազմաթիվ բանաստեղծական ժողովածուների հեղինակ, նաև` մանուկների համար:
Ռուսաստանի արվեստի վաստակավոր գործիչ է, մի շարք գրական մրցանակների ու պարգևների դափնեկիր: Իր յուրաքանչյուր տողով, ամեն բառով Բոյարինովը հավատարիմ է ռուսական դասական պոեզիայի բարձր ավանդույթներին ու կենսահաստատ ուժ, դրական էներգիա է փոխանցում ընթերցողին:
օ օ օ
Ո´չ հրաշքներ եմ տեսել իմ ճամփին,
Ո´չ ինչ-որ վայրում գտել եմ գանձեր,
Բայց նոր օրվա հետ, վառ արշալույսին
Ինչ-որ լավ բան եմ միշտ սրտիս
բացել:
Առեղծվածայի´նն անհաս աստղերի,
Հավերժակա&undefined;´նը` երգերում մարդկանց,
Սոսափ-շրշյու&undefined;´նը ծառ ու թփերի
Լսել եմ վերին կարոտով անանց:
Իսկ թե դժվարին ի˜նչ նոր ճամփեքով
Խաղաղ, անխռով դեռ պիտի անցնեմ,
Ես հասկացել եմ անխաբ իմ մտքով,
Հասու եղել իմ հավատով վսեմ:
օ օ օ
Երբ ես ջահել ու հաջողակ էի,
Սատանայի´ց էլ չէի վախենում,
Վիրավորանքներն ու ցավերը իմ
Չէի հաշվում, շատ հե´շտ էի տանում:
«Բացվիր, Սեզա´մ»,-հենց
հնչում էր խոսքն իմ,
Ցանկացած դուռ լայն բաց էր իմ առաջ:
Չէի հավատում քո արցունքներին,
Չեմ հավատում և այսօր, անկասկած:
Ներիր, այս ցավը բույն հյուսեց լռին,
Թաքուն, աննկատ իմ ներսում փակվեց,
Հոգուս հատակին, ընդերքում խորին
Դանդաղ, աննկատ աղի փոխարկվեց:
Այնպես թանձրացավ, պինդ նստեց
իմ մեջ,
Որ նույնիսկ լինգով դժվար է պոկել,
Նա արդեն սիրո ազգականն է հենց,
Չի թողնի իրար ողջ հոգով տրվել:
Արի էլ ցավն այս չհիշենք երբեք,
Որ զիջենք իրար, չվիճենք կրկին:
Արի այսուհետ երբե´ք, էլ երբե´ք
Աղն այս չցանենք մենք մեր վերքերին:
օ օ օ
Թանձրանում է տրտմությունը
աչքերիս մեջ,
Մեղավոր իմ ժպիտի խոր
կիրճում թաքուն.
Պե&undefined;տք չէ ոչ մի ինքնաձաղկում.
մեզնից առաջ
Մեր մեղքերը նախանշված են երկնքում:
Ծիածանի տակ երջանիկ իմ ժպիտի
Շփոթմունքն է աչքերիցս հանկարծ
ցայտում.
Պետք չէ տանջվել. միևնույն է,
մեզնից առաջ
Մեր սխալներն ուղղված են հենց
երկնքում:
օ օ օ
Ի՞նչ է եղել սկզբում` ես չեմ հիշում,
Ու չգիտեմ` ի՞նչ կլինի դեռ վերջում:
Երանորեն պառկած եմ այս լողափին,
Ինչպես բակում մեր` մանկության
օրերին:
Հետևում եմ վարքին մոլոր մժեղի,
Որսում եմ գոլ ջրաշիթերը աղի:
Եվ այս ափը , որ ինձ դուր է եկել շատ,
Սիրում եմ իմ վերջին սիրով անարատ:
Մանրահատիկ, տաք ավազին
մեկնվում,
Հուզվում եմ ես, քաղցր-ցավոտ
արտասվում:
Ի՞նչ կլինի ինձ հետ,- ոչինչ չգիտեմ,
Ո´չ էլ ուզում եմ իմանալ ես արդեն:
ՍԻՐԵԼԻԻՍ ՀԵՏ
Ես ո´չ սիրված եմ, ո´չ էլ սիրում եմ,
Ցավն իմ կխեղդեմ բաժակում օղու,
Մոտիկ կալվածքն իմ հրի կմատնեմ
Ու անհայտ մի վայր կընտրեմ ապրելու:
Իսկ դու ապրի´ր քո բախտին ենթակա,
Իսկ դու մտքիցդ ինձ ընդմիշտ հանի´ր:
Ես այս աշխարհում վաղուց էլ չկամ,
Չեմ էլ եղել այս աշխարհում նանիր:
Տարօրինակ իմ նախնիքի նման
Ես էլ խենթությամբ կհաղթեմ թշնամուս,
Արջը սահնակիս լծած` կգնամ
Ձեռքը խնդրելու հարևանուհուս:
Ու թեկուզ մերժի, չընդունի նա ինձ,
Մեկ է, վայելք է անդորրն հունվարյան,
Վաղ առավոտյան իմ պատուհանից
Կհրճվեմ ուրախ շուրջպարով նոր ձյան:
Թե ինչու, ինքս էլ դեռ չիմանալով,
Ծառ ու թփի հետ կխոսեմ այգում:
Զգում եմ` ոնց է ճոխ շքախմբով
Սիրելիս հիմա ինձ մոտ սլանում:
Մուշտակն ընթացքում դու դեն կնետես
Ու նախասրահ կթռչես մեկեն.
«Հիմա´ր, գիտեիր` չե՞մ գտնելու քեզ»:
Եվ ես` հիմարս, քո դեմ կծնկեմ: