Գնահատականները պետք է լինեն համարժեք,-

ասում է ՀՀԿ- ական Հովհաննես ՍԱՀԱԿՅԱՆԸ

- Նախորդ նիստը ԲՀԿ պատգամավորական խմբակցության բոյկոտը խմբակցության անդամ Նաիրա Զոհրաբյանը պատճառաբանեց խորհրդարանում ստեղծված ոչ կառուցողական մթնոլորտով: Դուք ինչպե՞ս կմեկնաբանեիք ԲՀԿ այս դիրքորոշումը:

- Այդ ամենն իմ կարծիքով տեղավորվում է քաղաքական գործընթացների մեջ, և ինձ թվում է` քաղաքական առումով, դա տեսակետ հայտնելու որոշակի քայլ էր: Նորմալ եմ համարում, որովհետև մենք այսօր տեսանք, որ մեր գործընկերները ներկա են և բնականոն աշխատանքային գործընթացը վերականգնվել է:

- Նրանք ասում էին, թե կոռուպցիայի դեմ չէ այդ օրենքը, այլ նպատակ ունի բանկերին հավելյալ աջակցություն ցուցաբերել:

- Դա կարծիք է: Մեկնաբանությւններն ընդհանրապես տարբեր են լինում: Մենք գտնում ենք, որ օրենքը լուրջ քայլ էր, որպեսզի կանխիկ դրամաշրջանառությունը սահմանափակ վի և մտնի ավելի օրինական դաշտ, ու երևա, թե ինչ գործարքներ են իրականացվում, ինչ գումարներ են շրջանառվում:

- Իսկ այս ամենի տակ թաքնված նախընտրական երանգներ չե՞ք տեսնում:

- Նախընտրական ժամանակաշրջանում քաղաքական ուժերի գործելաոճը տարբերում է բնականոն ժամանակաշրջանի աշխատաոճից: Բայց չեմ կարծում, թե դա այն քայլն էր, որի մեջ պետք էր ինչ-որ քաղաքական կամ նախընտրական ենթատեքստ դնել, որովհետև մեր գործընկերների կողմից կան ավելի լուրջ շեշտադրումներ` կապված`100 տոկոս համամասնական ընտրակարգի հետ: Իմ կարծիքով` երբ այդ խնդրի վերաբերյալ կլինի քվեարկություն, որով քաղաքական ուժերն իրենց տեսակետները կհայտնեն, և մեզ համար ամեն ինչ ավելի պարզ կլինի:

- Իսկ ի՞նչ եք կարծում, ԲՀԿ-ՀՀԿ առկա տարաձայնությունները, դրանց խորացումը սպառնում են արդյոք կոալիցիայի փլուզմամբ:

- Չեմ կարծում, որովհետև դրա համար պետք են քաղաքական շարժառիթներ և ավելի լուրջ պատճառներ:

- Իսկ օրենքին դեմ լինելը մի՞թե քաղաքական շարժառիթ չէ:

- Ընդունում եմ, բայց դա այն խնդիրը կամ շարժառիթը չէ, որը կարող է հիմք հանդիսանալ կոալիցիայի փլուզման համար:

- Համամասնական-մեծամասնական հարցի շուրջ ՀՅԴ-ի և «Ժառանգության» հրավիրած խորհրդաժողովում, որքան հիշում եմ` Դուք համամասնական կամ մեծամասնական ընտրակարգերից որևէ մեկին առավելություն չտալով, ասացիք, որ խնդիրը քաղաքական է, և քաղաքական ուժերը կլուծեն այն:

- Ես բազմիցս հայտնել եմ անձամբ իմ և ՀՀԿ-ի տեսակետը: Մենք կողմ ենք այս` 41 մեծամասնական և 90 համամասնական ձևաչափով ընտրություններին և ասել եմ, որ կան իրավական մի շարք խնդիրներ ու պատճառներ` այնուամենայնիվ նշելով, որ գլխավորը քաղաքական դրդապատճառն է: Եվ մի շարք ծանրակշիռ դրդապատճառներից ելնելով` քաղաքական մեծամասնությունն այսօր նպատակահարմար է համարում խառը ընտրակարգը:

- Իսկ Դուք արդյո՞ք չեք գտնում, որ շարքային քաղաքացու, ընտրողի համար միևնույն է, թե որ ընտրակարգով պատգամավոր կընտրի: Նրա համար կարևորվում է ընտրությունների ազատ ու արդար ընթացքը:

- Ոչ միայն ես, այլ նաև մեր ընդդիմադիր գործընկերների եզրահանգումն այն է, որ ընտրությունները պետք է անցկացվեն ազատ, արդար, թափանցիկ: Իմ կարծիքով, խնդիրն իրականում ոչ թե մեծամասնականը կամ համամասնականն չէ, այլ մեր մշակույթի ձևավորումը, մեր քաղաքական կամքը:

- Այսօր քննարկվող` ստեղծվող էթիկային հանձնաժողովի մասին օրինագծի վերաբերյալ հարցնեմ: Առաջարկ կա, որ հանձնաժողովը ղեկավարը լինի ընդդիմությունից: Ի՞նչ կարծիք ունեք:

- Նախագծում նշված է, որ բոլոր խմբակցությունները պետք է ղեկավարեն, և դա ռոտացիոն կարգով սահմանված է: Դա նորմալ եմ համարում: Պարզապես իրավական առումով ոչ մի գնահատական չի տրվում: Կցանկանայի, որ ավելի իրավական գնահատականներ լինեին:

- Իսկ ինչքանո՞վ է հնարավոր, որ էթիկայի հանձնաժողովը նպաստի, որպեսզի պատգամավորները ելույթ ունենալիս կամ կողքից արձագանքելիս` խորհրդարանին անհարիր արտահայտություններ թույլ չտան, ինչին, ցավոք, բազմիցս ենք ականատես եղել:

- Օրինագծում վարքագծի որոշակի սահմանում կա: Իմ կարծիքով, հանձնաժողովն, այնուամենայնիվ, լուրջ կանխարգելիչ դեր կունենա: Ես գոնե հակված չեմ նոր ստեղծվող այդ կառույցին ի սկզբանե բացասական գնահատական տալ:

- Նաև ասվեց, որ մի քանի անգամ անվայելուչ պահվածքի դեպքում հանձնաժողովը կարող է նպաստել պատգամավորին հետ կանչելուն, մանդատից զրկելուն: Բայց ինչպե՞ս կարող է դա կիռարվել, երբ պատգամավորը վերջ ի վերջո ինչ-որ քանակի քվե ունի: Այդպիսով արդյո՞ք ժողովրդավարության սկզբունքը չի խախտվի:

- Պատգամավորն այսօր էլ կարող է հետ կանչվել, զրկվել մանդատից: Չեմ կարծում, թե ժողովրդավարության սկզբունքի խախտման խնդիր կառաջանա: Խոսքն ընդամենը վարքագծի կանոնների խախտում արձանագրելու մասին է: Սահմանադրության հոդված 65-ը սահմանում է, թե պատգամավորն ինչով պետք է զբաղվի, և եթե Սահմանադրության խախտում կա, ապա դա ավելի հրապարակային է դարձնում, և գնահատականները պետք է լինեն համարժեք ու արդար: