Գերմանիայի կանցլեր Անգելա Մերկելին այդպես էլ չհաջողվեց Բունդեսթագի ընտրություններից հետո այնտեղ տեղեր գրաված կուսակցություններից կոալիցիա ձևավորել, որպեսզի վստահ լինի, որ իր իշխող կուսակցությունը խորհրդարանում որոշիչ դեր կկատարի:

 

Նոյեմբերի 20-ին բանակցությունների ընդհատումից հետո էլ  քաղաքական գործիչները դեռևս կոչ են անում շարունակել բանակցությունները կոալիցիա կազմելու նպատակով: Մերկելն ինքն էլ, լրատվամիջոցների հաղորդմամբ, պատրաստ է Գերմանիայի Սոցիալ-դեմոկրատական կուսակցության հետ բանակցել նոր «մեծ կոալիցիայի» ձևավորելու վերաբերյալ, սակայն հենց ինքն էլ անհեռանկար է համարում նման բանակցությունները:

 

Գերմանիայի կառավարության ղեկավարը նաև հեռանկարային չի համարում փոքրամասնությամբ կառավարություն ձևավորելը, ուստի դրությունից դուրս գալու ամենալավ տարբերակը խորհրդարանական նոր ընտրություններն է համարում: 

 

Անգելա Մերկելը պատրաստ է իր գլխավորած «Քրիստոնեա-դեմոկրատական միություն» կուսակցությամբ վերստին մասնակցել այդ նոր ընտրություներին: Այս մասին նա ասել է DW պարբերականի լրագրողին: Կանցլերի խոսքով՝ ինքը պատասխանատու մարդ է և պատրաստ է հետագայում նույնպես ստանձնել այդ պատասխանատվությունը, ու այժմ էլ, երբ Ազատ դեմոկրատների կուսակցությունը հրաժարվել է կոալիցիա կազմել, մտադիր չէ պաշտոնից հրաժարվել: Նա շեշտել է՝ հրաժարական տալու պատճառ չի տեսնում: 

 

Գերմանիայում ստեղծված իրավիճակին անդրադարձել է նաև Եվրահանձնաժողովի նախագահի պաշտոնական ներկայացուցիչ Մարգարիտիս Սխինասը:

 

- Մենք վստահ ենք, որ Գերմանիայի սահմանադրական գործընթացները հիմք են ապահովում կայունության ու հաջորդականության համար,- հայտարարել է նա:

 

Ըստ վերջինիս՝ հենց այդ հատկություններն են «գերմանական քաղաքականության տարբերվող նշանները», և Բրյուսելը հույս ունի, որ այսուհետ ևս այդպես կլինի՝ չնայած ներկայիս քաղաքական ճգնաժամին:

 

Գերմանիայի քաղաքական ճգնաժամը անտարբեր չի թողել եվրոպական մյուս երկրների ղեկավարներին: Մտահոգության հիմնական շեշտադրումն այն է, թե այդ ճգնաժամը որքանո՞վ կազդի Եվրոպայի ընդհանուր կայունության վրա: 

 

Ֆրանսիայի նախագահ Մակրոնը, օրինակ, նշել է, թե ԵՄ-ն Բեռլինում քաղաքական ճգնաժամի խորացմամբ շահագրգռված չէ: «Ֆրանս պրեսն» էլ մեկնաբանել է, թե  գերմանական ճգնաժամը հարվածել է ԵՄ-ում լայնածվալ բարեփոխում անցկացնելու վերաբերյալ Մակրոնի ծրագրերին: 

 

Մեծ Բրիտանիայի վարչապետ Թերեզա Մեյն իր հերթին հույս է հայտնել, թե Բեռլինում խոհրդակցությունների ձախողումը բացասաբար չի ազդի Եվրամիությունից Միացյալ Թագավորության դուրս գալու բանակցությունների վրա: Իսկ ահա Նիդեռլանդների ԱԳ նախարար Հալբե Զեյլսթրան Գերմանիայում կատարվողը Եվրոպայի համար վատ նորություն է որակել: Նրա կարծիքով՝ եթե «ԵՄ շատ ազդեցիկ երկիր Գերմանիան» երկար ժամանակ մնա առանց կառավարության, ԵՄ-ում խիստ որոշումներ ընդունելը «դժվար կլինի»:

 

Հազիվ էր «Ինդեփենդենթը» հրապարակել Սայմոն Անհոլտի ազգային որականիշների դասիչը, ըստ որի աշխարհի 50 երկրների թվում Գերմանիան լավագույնն է ճանաչվել, վրա հասավ քաղաքական ճգնաժամը: Իսկ դրա արագ կարգավորումը, ինչ խոսք, շատ կարևոր է Եվրոպայի, ասել է թե՝ նաև ամբողջ աշխարհի կայունության համար: Միայն թե ինչքան էլ քաղաքագետներն ասում են, որ աշխարհում դեռևս կուսակցություններից լավ քաղաքական գործիք չի ստեղծվել, տարբեր երկրների ներքաղաքական ճգնաժամերը վկայում են՝ այդ գործիքն արդեն քարե կացնից ավելի առաջադիմական չէ: