«Մեդիա կենտրոնում» կայացած՝ «Հեղափոխություն՝ մշակույթո՞վ, թե՞ առանց մշակույթի» թեմայով քննարկմանը մասնակցում էին ՀՀ Մշակույթի նախարար Լիլիթ Մակունցը, բանաստեղծ Վիոլետ Գրիգորյանը, ճարտարապետ Միսակ Խոստիկյանը, «Հայեր» համահայկական մեդիահարթակի գլխավոր խմբագիր Արայիկ Մանուկյանը և նկարիչ Սամվել Սաղաթելյանը:

 

Որպես կանոն, գիտության, արվեստի  մարդիկ պետության հետ իրենց փոխհարաբերությունը պատկերացնում են նյութական աջակցությամբ: Սակայն պետությունն էլ հակադարձում է, թե ինքն է գիտության, մշակույթի մարդկանցից ակնկալում այնպիսի աշխատանք, որը փող կբերի: Վերջերս էլ վարչապետի և մշակույթի գործիչների հանդիպման ժամանակ ՀՀ վարչապետ Նիկոլ Փաշինյանն ասաց, որ բյուջեից մշակույթին հատկացվող գումարներն այն դեպքում կարելի է արդարացված համարել, եթե

այդ արտադրանքից օգտվում է հարկատուն, քաղաքացին:

 

Ի պատասխան Մեդիա կենտրոնի հարցին, թե  ի՞նչ է առաջարկում պետությունը և ի՞նչ է ակնկալում մշակույթ ստեղծող մարդկանցից, Մշակույթի նախարարը մասնավորեցրել է. 

 

- Կարևոր է մրցակցային և թափանցիկ դաշտի ապահովումը…Կարևոր է ներքևից վերև խնդիրների քննարկման, որոշումների, լուծումների փնտրտուքը… Արվեստագետներից ակնկալում ենք բարձրագույն արժեքների ստեղծում: 

 

Այն դիտարկմանը, թե  պետությունն իր մշակութային քաղաքականությունը կազմելիս  հիմնվում է այն տեսակետի վրա, որ մշակույթն ու արվեստը պետք է ծառայեն զանգվածներին, արվեստը քարոզչական ու դաստիարակչական միջոց է, Վիոլետ Գրիգորյանը նշել է, որ՝ 

 

- Պետությունը պետք է ունենա տեսլական մշակույթի և արվեստի զարգացման համար: Մշակույթի նախարարությունը չպետք է փող չտալը ներկայացնի որպես գաղափարախոսություն, քաղաքականությունը պետք է հստակ լինի, իսկ արվեստի մրցակցություն չկա:

 

Իսկ ճարտարապետ Միսակ Խոստիկյանի կարծիքով՝ իշխանությունները պետք է բովանդակային խոսակցություն սկսեն փորձագետների, ոլորտի մասնագետների, արվեստագետների հետ. 

 

- Մի նրբություն կա՝ պետք է բուն ստեղծագործական հարցերը չդրվեն կոնտեքստների մեջ, որոնք լայն են ու անորոշ, դրա համար էլ նրբությունները կորում են:

 

Նկարիչ Սամվել Սաղաթելյանի կարծիքով էլ արվեստը մշակույթի ստեղծած կաղապարները կոտրելու միտում ունի. 

 

- Մշակույթի նախարարության և արվեստագետների հարաբերվելու միակ ձևը արվեստի առաջնայնությունն է: Արվեստը առաջնային է, մշակույթը ստեղծվում է դրանից հետո, դրա հիմքի վրա: 

 

«Հայեր» համահայկական մեդիահարթակի գլխավոր խմբագիր Արայիկ Մանուկյանը համոզված է, որ եթե չունենանք մշակութային այնպիսի քաղաքականություն, որը պայմանավորված չլինի այս կամ այն նախարարի անձով, այլ ցույց տա, թե մշակույթի զարգացման ինչ ճանապարհ է տեսնում պետությունը, նոր միայն հնարավոր կլինի խոսել, թե հեղափոխությունը տեղի է ունեցել նաև մշակույթում: