Մեկնարկում է «Մանկապատանեկան ընթերցանության կազմակերպումը գրադարաններում» թեմայով վարպետության դասընթացը՝ գրադարանավարների համար

 

IBBY Հայաստան ՀԿ-ն (Մանկապատանեկան գրքի միջազգային կոմիտեի հայաստանյան մասնաճյուղ) Հայկական գրադարանային ասոցիացիայի հետ համատեղ՝  2017 թվականի հուլիսի 5-7-ը կանցկացնի «Մանկապատանեկան ընթերցանության կազմակերպումը գրադարաններում» թեմայով վարպետության դասընթացը:

Դասընթացը կմեկնարկի հուլիսի 5-ին՝ ժամը 10:00-ից, Խնկո Ապոր անվան ազգային մանկական գրադարանում:

Վարպետության դասը կվարի Լիոնի (Ֆրանսիա) քաղաքային գրադարանի մանկապատանեկան գրականության բաժնի վարիչ Վիոլին Կանմաչերը: Դասընթացը կիրականացվի ֆրանսերենից հայերեն համաժամանակյա թարգմանությամբ: 

 

Գրադարանավարների համար նախատեսված այս դասընթացին կմասնակցեն ՀՀ մարզպետարաններին, Երևան քաղաքի վարչական շրջանների ղեկավարներին հղված IBBY Հայաստան ՀԿ-ի իրազեկում-դիմումի հիման վրա ընտրված և ներկայացված ՀՀ 10-ը մարզային և մայրաքաղաքային, համայնքային 10-ը գրադարաններից 1-ական ներկայացուցիչ՝  20 գրադարանավար: Թիրախավորված են մանուկներին և պատանիներին սպասարկող գրադարանավարները: 

 

Դասընթացի նպատակն է նպաստել ՀՀ-ում գրադարանային գործի զարգացմանը, հայաստանյան գրադարանավարներին փոխանցել մանկապատանեկան ընթերցանության կազմակերպման և այդ տարիքային խմբի գրադարանային սպասարկման նոր հմտություններն ու գիտելիքները` ներկայացնելով նորարարական փոխգործուն, համագործակցային, նախաձեռնողական գործելաոճի արդի առանձնահատկությունները: 

 

Նախաձեռնության դինամիկ արդյունավետությունն ապահովելու համար գրադարանավարները դասընթացի շրջանակում ստացած նոր գիտելիքները, կարողություններն ու հմտությունները գործնականում պետք է կիրառեն նշյալ տարիքային խմբի հետ աշխատանքում:

 

ՀՀ մշակույթի նախարարության աշխատակազմի

հասարակայնության հետ կապերի բաժին