Հայ բեմի երախտավորների դիմանկարները կհանգրվանեն Հայաստանի թատերական գործիչների միությունում 

 

«ԿԱՌԼԼԵՎՈՆԻ» պատկերասրահում այսօր բացված՝ մեր հայրենակից, ռոստովաբնակ քանդակագործ, նկարիչ Ներսես Կիրակոսյանի ցուցահանդեսում ներկայացված են վերջին մեկ տարվա ընթացքում հեղինակի կատարած գրաֆիկական աշխատանքները: Ներկա էին մշակույթի և արվեստի գործիչներ: 

 

- Այս ցուցահանդեսի գաղափարը շատ պատահական հղացավ՝ 2016-ին կայացած առաջին անհատական ցուցահանդեսի ժամանակ: Որոշեցի պատկերել հայ բեմի երախտավորներին, որ գալիք սերունդը չմոռանա նրանց ու հիշատակը միշտ վառ պահի,- ասաց նկարիչը: 

 

Ն. Կիրակոսյանի փոխանցմամբ՝ խորագիրը կլինի շարունակելի. 

 

- Անշուշտ, ցանկություն կա շարունակել այս գաղափարն ու առաջիկայում ներկայացնել հայ բեմի այլ երախտավորների դիմանկարներ, քանի որ այստեղ ոչ բոլորն են ներկայացված: Բանն այն է, որ այս աշխատանքներն արված են խիստ հաշվարկով. հաշվի ենք առել թատերական գործիչների միության ճեմասրահը, որտեղ շուտով կհանգրվանեն հայ բեմի երախտավորները: 

 

ՀԹԳՄ նախագահ Հակոբ Ղազանչյանը, բարձր գնահատելով նկարչի արվեստը, Ն. Կիրակոսյանին պարգևատրեց ՀԹԳՄ ոսկե մեդալով՝ հայ բեմարվեստի երախտավորների դիմանկարները վարպետությամբ ստեղծելու և դրանք անհատույց Հայաստանի թատերական գործիչների միությանը նվիրաբերելու համար: 

 

- Աննախադեպ գաղափար է, որի մասին անցած տարի տեղեկացա: Պետք է ասեմ, որ սա շատ մեծ և շռայլ նվեր է մեզ համար, ինչի համար շնորհակալություն հեղինակին: Կարծում եմ, որ այն կծառայի նպատակին. ցավոք սրտի, մեր երիտասարդները շատ քիչ գիտեն հայ բեմի երախտավորների մասին, - ասաց Հ. Ղազանչյանը: 

 

Ցուցահանդեսը կգործի մինչև ս.թ. սեպտեմբերի 6-ը: