Մարդ արարծը սիրում է, չէ՞, տարբեր կենդանիների կռվեցնել ու զվարճանալ: Սակայն երբևէ մեկի մտքով անցե՞լ է արջերին կռվեցնել, որպեսզի դրանից ցուցադրություն սարքի: Իսկ ահա մեր ժամանակներում ամենուր տեղադրված տեսախցիկները մեկ-մեկ այնպիսի տեսարաններ են նկարահանում, որոնք մարդը այլ կերպ չէր կարողանա տեսնել:

 

ԱՄՆ-ի մի քանի կենդանաբաններ ուրախությունից գլուխները կորցրել են, երբ դիտել են Հյուսիսային Կարոլինայի անտառապատ վայրերից մեկում տեղադրած տեսախցիկի նկարահանումները: Տեսանյութի գլխավոր հերոսները երկու սև արջերն են, որոնք հենց տեսախցիկի առջև սկսել են շատ բուռն կերպով հաշիվ պարզել: Ուշ գիշերը տեղի ունեցած ծեծկռտուքն ընդամենը մեկ րոպե է տևել, իսկ նկարահանումը ամրագրել է կատաղի թափահարվող թաթեր ու մագիլներ և բաց երախներ: 

 

Մասնագետների համար մեծագույն հաջողություն է այն, որ գազանները իրենց ծեծկռտուքը ձեռնարկել են նկարահանման համար ամենահարմար կետում, այնպես որ նրանց այդ միանգամայն ինքնաբուխ բախման տեսագրությունն այժմ ամբողջ համացանցի սեփականությունն է: