Ինչպես ուռին ու բարդին՝ ամեն երկիր իր դարդին

ԹՈՒՐՔԻԱՆ ԿՄՏՆԻ ԽԱՂԻ ՄԵՋ

 
Արցախի նախագահի հետ հանդիպումը  ոչ մի արդյունք կարծես թե չտվեց: Համենայնդեպս դա  են փաստում ԵԱՀԿ Մինսկի խմբի  համանախագահների այցը Ստեփանակերտ ու եռանախագահների  հայտարարությունը: Թերևս միակ տեղաշարժը կարելի է համարել Բաքվի ձևական խոսքերը, թե   Արցախի խնդրի բանակցային ձևաչափն ու փաստաթուղթը չի փոխվել: 
 
Արցախի նախագահը համանախագահների հետ հանդիպմանն  անդրադարձել է Ադրբեջանի ապակառուցողական քաղաքականությանը, զինադադարի ռեժիմի խախտումների և միջազգային նորմերի ու սկզբունքների ոտնահարման բազմաթիվ փաստերի՝ դրանք որակելով որպես հակամարտության կարգավորման հիմնական խոչընդոտներ և տարածաշրջանում խաղաղությունն ու կայունությունը պաթարող լուրջ վտանգներ: Բակո Սահակյանը վերահաստատել է պաշտոնական Ստեփանակերտի հավատարմությունն ադրբեջանա-ղարաբաղյան հակամարտության խաղաղ կարգավորմանը՝ ԵԱՀԿ Մինսկի խմբի շրջանակներում:
 
Ուշադրություն դարձնենք. եթե նախկինում՝ մինչ ապրիլյան պատերազմը, վերոնշյալ նախադասությունն ավարտվում էր «Մադրիդյան սկզբունքների հիման վրա» բառակապակցությամբ, հիմա դա բացակայում է: Սա նշանակում է, որ հայկական կողմն ակնարկում է՝ քանի դեռ Բաքուն իր ապակառուցողական  քաղաքականությունը շարունակում է, ապա ոչ մի սկզբունք ու ձևաչափ չի կարող սայլը տեղից շարժել: 
 
ԵԱՀԿ ՄԽ ֆրանսիացի համանախագահ Ստեֆան Վիսկոնտին հավաստիացրել է.
 
- Մեզ համար անվտանգության և խաղաղ կարգավորման գործընթացի խնդիրները շատ կարևոր են: Ֆրանսիայի նորընտիր նախագահ Էմանուել Մաքրոնը ծանոթացել է իրավիճակին: Ֆրանսիան, ԱՄՆ-ը և Ռուսաստանը գործադրում են հնարավոր բոլոր ջանքերը, որպեսզի այդ հարցում առաջընթաց գրանցեն:
 
Ամերիկացի համանախագահ Ռիչարդ Հոգլանդի խոսքերն առանձնապես նորություն չեն, բայց ուշագրավ է, որ նա խոսել է  տնտեսության տարբեր ճյուղերի, ֆինանսական հատվածի և շատ այլ հարցերի մասին: Այսինքն՝  ԱՄՆ-Արցախ-Հայաստան համագործակցությունը  միայն  Արցախի խնդրով չի սահմանափակվում: Հիշեցնենք Արկադի Տեր-Թադևոսյանի  հայտարարություններից մեկը, թե  սահմանում տեղադրվել են ամերիկյան արտադրության սարքավորումներ: Չմոռանանք նաև ՀՀ-ում ԱՄՆ-ի դեսպանի՝ վերականգնվող էներգետիկայի ոլորտում 8 մլն դոլարի պոտենցիալի առկայության մասին հայտարարությունը:
 
Ռուս համանախագահ Իգոր Պոպովն էլ, ի տարբերություն մյուս համանախագահների, կարևորել է սահմանում լարվածությունը կանխելը: Մեր դաշնակցի այս պահվածքը լրիվ հասկանալի է՝ պատերազմ սկսվելու ու շարունակվելու դեպքում Մոսկվան կմտնի խաղի մեջ: 
 
Թե ինչ են խոսել համանախագահները կուլիսներում՝ դեռ պարզ չէ: Գուցե Բաքվի առաջիկա հայտարարություններից կարողանանք կռահել դա: Բայց փոխադարձ մեղադրանքների  պակաս չկա՝  հայտարարությունների մակարդակով:
 
Ի դեպ. օրեր առաջ տեղեկություն հրապարակվեց, որ  Նախիջևանում թուրք-ադրբեջանական համատեղ զորավարժություններ կանցկացվեն: Չի բացառվում, որ Անկարան սրանով հասկացնում է, թե Արցախի խնդրի սրվելու դեպքում նա ևս կմասնակցի պատերազմին՝ «պուճուր ախպոր»՝ Բաքվի թիկունքին կանգնելով: 
 
Երևի գերտերությունները հենց սա են հաշվի առել, որ օրումեջ  ոչինչ չտվող կոչեր են հղում՝ փոխանակ արդյունավետ քայլեր անելու:
 
Իսկ եթե անկեղծ՝ ապա թույլ տվեք բարձրաձայնել մեր այն կասկածը, թե նրանք կոչերից այն կողմ այլ ծրագիր կամ ցանկություն էլ ունեն: Դե, զսպաշապիկները նաև ժամկետանց ու անօգտագործելի էլ են լինում: