Ազգային ժողովում այսօր Կենտրոնական ընտրական հանձնաժողովի 2016թ. տարեկան գործունեության հաշվետվության քննարկմանն իր ելույթի ժամանակ պատգամավոր Նաիրա Զոհրաբյանը հայտարարեց, որ վերջին օրերին խորհրդարանում տարօրինակ հայտարարություններ են հնչում.

 

- Ջերմային ֆոնի բարձր պռեսինգի՞ց է,- ենթադրեց օրենսդիր մարմնի անդամը:

 

Ն. Զոհրաբյանի համար անհասկանալի էր ՀՀ գլխավոր դատախազ  Արթուր Դավթյանի հայտարարությունը:Դատախազը պնդում է, թե դատախազությունում կոռուպցիոն ռիսկերը զրոյացված են: 

 

- Ի դեմս 330 դատախազների՝ ունենք սրբադասության հավակնորդներ, և ի՞նչ է մնում՝ դիմել Մայր աթոռ՝ 330 դատախազներին սրբակարգելու համար,- ասաց օրենսդիր մարմնի անդամը : 

 

Խոսելով  ԿԸՀ հաշվետվության մասին՝ պատգամավորը հարց ուղղեց ԿԸՀ ղեկավար Տիգրան Մուկուչյանին.

 

- Պարոն Մուկուչյան, ո՞ւմ հայտնի չէ, որ մեր երկրում կա տոտալ անվստահություն ընտրությունների նկատմամբ: Ո՞ւմ հայտնի չէ, որ ընտրական գործընթացում իշխանություններն օգտագործել և օգտագործում են վարչական ռեսուրս: Ինչպե՞ս է լինում, որ բոլոր ՔԿՀ-ներում, հոգեբուժարաններում այդ «կոնտինգենտը» իշխանությանն է ընտրում: 

 

Նաիրա Զոհրաբյանը նաև անդրադարձավ  վարկանիշային ընտրակարգին՝ առաջարկելով փոխել այդ ընտրակարգը:   

 

«Ելք» խմբակցության ղեկավար Նիկոլ Փաշինյանին ևս մտահոգում էր ընտրություններում վարչական ռեսուրսի օգտագործումը. Մասնավորապես՝ կրթական օջախների ղեկավարին, աշակերտներին  ընտրական գործընթացներում օգտագործելը: 

 

- Դպրոցի տնօրենն ի՞նչ կարող է անել, աշակերտի ծնողին կարո՞ղ է ցուցակում ներառել և դա անել աշխատանքի ժամին: Ո՞րն է վարչական ռեսուրսի չարաշահումը, ձեր ասած վարչական ռեսուրսի չարաշահումը կատվի է նման, ոնց գցում ես՝ ոտքերի վրա է կանգնում,-ասաց Նիկոլ Փաշինյանը:

 

Ընդդիմադիրը հանկարծ հիշեց, որ սովետական տարիներին պաշտոնապես հայտարարվել էր, թե Սովետական Միությունում սեքս չկա և դիմեց այլաբանության ժանրին.

 

- Դուք ի վերջո կարա՞ք ասեք՝ ՀՀ-ում սեքս կա՞, թե՞ չկա… Նկատի ունեմ ընտրակաշառքը և վարչական ռեսուսրի չարաշահումը, եթե ասեք չկա, մենք ի գիտություն կընդունենք: 

 

Տիգրան Մուկուչյանը պատասխանեց, թե բնականաբար կան երևույթներ, որոնք սահմանված  կարգով կարող են չարաշահում  համարվել, բայց հանձնաժողովին ներկայացված թղթերում, որոնք գտնվել են անհայտ աղբյուրից, կամ աղբարկղից, հիմք չկա չարաշահում արել: Հետո էլ հավաստիացրեց, որ պատգամավորի վկայակոչած հարցերի պատասխաններն իրենց գնահատականներն ստացել են ընտրությունների արդյունքների ամփոփման մասին ԿԸՀ-ի որոշման մեջ: