ՀՀ առողջապահության նախարար Լևոն Ալթունյանն այսօր մտերմիկ մթնոլորտում ամփոփում էր նախարարության մեկ տարվա գործունեությունը: Ֆուրշետային հյուրասիրությամբ «Գրանդ Հոթել» հյուրանոցում նա մեկ ժամ էր նախատեսել ասուլիսի համար, որից 30 րոպեն օգտագործեց նախարարության կատարած աշխատանքը ներկայացնելու: 

 

Առաջին հարցը Տավուշի մարզում տարածված տուլարեմիա հիվանդության մասին էր: Նախարարը հավաստիացրեց՝ բոլոր հիվանդներն ապաքինվել են, մոտ 450 բնակիչ ստացել է պատվաստանյութ:

 

Առաջին անգամ չէ, որ Հայաստանում տուլարեմիա հիվանդությունն է բռնկվում: Տարիներ առաջ էլ   Գեղարքունիքի մարզում դա եղավ: Գուցե  ընտանեկան բժշկի ինստիտուտն այնքան էլ զարգացած չէ, որ կարողանան ժամանակին ախտորոշել: Եթե այդպես է, որեմն բյուջեի գումարները վատնվել են:  

 

- Տուլարեմիան Հայաստանի համար էնդեմիկ վարակ է: Հայաստանի տարածքում բնակվող կրծողները հանդիսանում են այդ վարակի կրիչ եւ փոխանցող: Հետևաբար, Հայաստանում չճանաչել տուլարեմիան մի քիչ դժվար է, որովհետեւ բժիշկները գիտեն այդ վարակի մասին,- ասաց գործադիր մարմնի անդամը: 

 

Ինչ վերաբերում է  ընտանեկան բժշկի համակարգին, ապա այն կայացել է այնքանով, ինչքանով որ կայացել է, բայց դեռ լավացնելու տեղ կա: 

Լևոն Ալթունյանն անդրադարձավ նաև նախկինում հնչեցրած իր մտքին, թե  շտապ օգնության որոշ ծառայություններ պետք է դարձնեն վճարովի: Ոլորտի պատասխանատուն պնդում է, որ այդ ծառայությունը որոշ առումներով դառնա վճարովի: Ըստ նրա, քաղաքացին չի ցանկանում գնալ պոլիկլինիկա, որովհետեւ անձրև է գալիս և գերադասում է ներարկման համար շտապօգնություն հրավիրել: Հենց նման ծառայությունները, նախարարի կարծիքով, պետք է լինեն վճարովի, և դրանք կարող է մատուցել շտապօգնությունը: Կամ՝ դիցուք, տատիկը ցանկանում է իր հիվանդության մասին զրուցել  շտապօգնության ծառայության աշխատակիցների հետ, քանի որ իր թոռնիկները Հայաստանում չեն:

 

Հետաքրքիր է իմանալ, թե մեր քաղաքացիներից քանի՞սն են այդպիսի հարցերով զանգահարում շտապօգնություն, որ նա  մտմտում է այդ ծառայությունները վճարովի դարձնել: 

 

- Վտանգավո՞ր է պապիլոմա վիրուսի դեմ կիրառվող «Գարդասիլ» պատվաստանյութը, որի մասին հնչում են տարբեր մտահոգություններ թե Հայաստանում, թե արտերկրում: 

 

Արի ու տես, որ նախարարության համար հիմք են ոչ թե լրատվամիջոցների հրապարակած փաստերը, այլ գիտական աշխատությունները, որոնց ուսումնասիրությունից էլ պարզվել է, որ այն մարդու առողջությանը ոչ մի վնաս չի հասցնում:

 

Մինչդեռ հենց մեր դաշնակից Ռուսաստանում այդ պատվաստանյութը չի կիրառվում: Ավելին, Ալթունյանի ռուսաստանցի գործընկերը վերջերս հայտարարեց, որ հաստատված չէ, թե «Գարդասիլը» կանխում է արգանդի վզիկի դեմ քաղցկեղը: Իսկ Ճապոնիան հրաժարվել է դա կիրառել: 

 

Նախարարը նաև հայտնեց, որ այս պատվաստանյութն արդեն 10 տարի է մեր երկրում կա և օգտագործվել է կամավոր, քանի որ այն 300 դոլար է: 1000-2000 կին ու աղջիկ պատվաստվել են, և կողմնակի ազդեցության դեպքեր չեն եղել.

 

- ԱՄՆ-ում եղել են պատվաստանյութի ներարկումից հետո երկարատև ցավեր ունենալու դեպքեր, որոնք, ինչպես հետո է պարզվել, ռևմատոիդային արթրիտի հետևանք էին, որի կապը պատվաստանյութի հետ անհնար էր ապացուցել: Նույն տրամաբանությամբ կարելի է ասել, որ վարունգ ուտողները   մահանում են:

 

Որպեսզի բնակչությանը համոզեն, որ պատվաստանյութն անվտանգ է, Հայաստանի առողջապահության նախարարության ղեկավար կազմի երեխաները և թոռներն առաջինը կպատվաստվեն մարդու պապիլոմայի վիրուսի դեմ:

 

Նախարարն այդպես էլ ուղիղ  չպատասխանեց նաև այն հարցին, թե արդյո՞ք իրեն գոհացնում է պոլիկլինիկաներում ծառայությունների մատուցման որակը։

 

- Մանուկ հասակում հաճախել եմ, գոհ եմ եղել պոլիկլինիկայից և անձնակազմից, դա վաղուց էր։ Արդեն նախարարի պաշտոնում գիտեմ պոլիկլինիկաների վիճակը, գիտեմ, որ դրանց մի մասը՝ 15-20 տոկոսը, վերանորոգման, 30-35 տոկոսը՝ վերազինման ու արդիականացման կարիք ունեն,- ասաց Ալթունյանը։