Մարտի 25-ին ազդարարվեց Հայաստանի ներդրողների ակումբ – հիմնադրամի ստեղծումը՝ ռուսաստանաբնակ 3 տասնյակ հայ գործարարների մասնակցությամբ և ամենահարուստ հայի՝ Սամվել Կարապետյանի գլխավորությամբ: Այդ գործարարները դեռևս հունվարին՝ Կարեն Կարապետյանի Մոսկվա կատարած այցի ընթացքում, պատրաստակամություն էին հայտնել աջակցել նրան: ԵՎ հիմա արդեն հայտարարում են ներդրումային ակումբ ստեղծելու մասին: 

Չի բացառվում, որ իշխանության այս քայլը կարող է նաև նախընտրական  «փիառ» լինել: Սակայն դա միաժամանակ ներդրումային դաշտը խրախուսող  գործնական քայլ է: 

Պատահական չէ  «Ծառուկյան» դաշինքի ղեկավար Գագիկ Ծառուկյանի այսօր հնչեցրած այն  հայտարարությունը, որ  արտերկրում ապրող իր բիզնես գործընկերները ցանկություն են հայտնել 15 մլրդ դոլարի ներդրում կատարել Հայաստանում: 

 

Կարեն Կարապետյանի այս քայլը  ոչ միայն տնտեսական զարգացման առաջին քայլը կարելի է համարել, այլև  ինչ-որ չափով հարված՝ քրեաօլիգարխիկ համակարգին:

 

Քաղաքական դաշտում իշխանությունը նրանց «վերացնելու», համենայնդեպս՝ նրանց մի մասին բարոյապես ոչնչացնելու հարցը լուծեց ռեյտինգային «միսկրծոցի» համակարգի ներդրմամբ, որին հաջորդեց վարչապետի նախաձեռնությունը: 

Կառավարության ղեկավարի մոտեցումը նաև կարող ենք որակել սինգապուրյան մեթոդ` ներսից ջարդել արատավոր համակարգը:  Իհարկե, ընտրություններից հետո  վերջնականապես պարզ կլինի, թե կհաջողվի՞ վարչապետին կյանքի կոչել իր ծրագրերը:  Եթե ՀՀԿ-ն մեծամասնություն ունենա, և այս նախաձեռնությունը կյանքի կոչվի՝ կբարելավվի հանրության սոցիալական վիճակը, ինչի շնորհիվ սոցիալական ծանր բեռը  ոչ մի կերպ թոթափել չկարողացող ժողովուրդը ստիպված չի լինի  բավարարվել այս կամ օլիգարխի՝ իրենցից գողացած փշրանքներով: Ի վերջո, ինչպես Գագիկ Ծառուկյանն է ասում՝ բարեգործությամբ երկիր չես պահի: 

 

«Դրայվով» վարչապետի նախաձեռնությամբ, փաստորեն, խաղի մեջ է մտնում ռուսական կապիտալը՝ հանձին Սամվել  Կարապետյանի, և  իրագործվում է տարիներ շարունակ հանրությանը մատուցված այն թեզը, թե Ռուսաստանն է  Հայաստանի  հիմնական տնտեսական գործընկերը: Սրա շնորհիվ գուցե աստիճանաբար իրենց երկրից և  օջախներից հեռու «խոպաններում» մեր հայրենակիցները կամաց-կամաց վերադառնան  հայրենիք: 

 

Այդժամ, ամենայն հավանականությամբ,  ռուսական կապիտալի ներհոսքը Հայաստան թասիբի կգցի նաև եվրոպական երկրներում  բիզնեսում  հաջողության հասած մեր հայրենակիցներին: