Ամբաստանյալ բժշկին ինչպե՞ս կարելի է թեստավորել

ԲՈՂՈՔՆ ԱՐԴԱՐԱՑԻ Է

Օրեր առաջ Առողջապահության նախարարությունը հայտարարեց, որ  ապրիլ- սեպտեմբեր ամիսներին կիրականացվի մանկաբարձ-գինեկոլոգների թեստավորում: Թեստավորման խնդիրն էլ ծագեց  այն ժամանակ, երբ  լրատվամիջոցներն իրենց ուշադրությունը սևեռեցին մայրական մահացության դեպքերին:  
Հիշեցնենք` 2016 թվականի 11 ամիսների ընթացքում մայրական մահացության 10 դեպք է գրանցվել:
Առաջին  հայացքից թվում է, թե պաշտոնական այս  հայտարարության մեջ արտառոց ոչինչ չկա:  Սակայն տարօրինակն այն է, որ թեստավորմանը մասնակցելու  են նաև այն գինեկոլոգները, ովքեր ամբաստանյալի կարգավիճակում  են ու շարունակում են  աշխատել հիվանդների հետ:  Հանգամանք, որը հարուցել է մահացած ծննդկանների հարազատների դժգոհությունը:
 
-Որքանո՞վ է տրամաբանական, որ   ամբաստանյալի կարգավիճակում  հայտնված  մանկաբարձ-գինեկոլոգը թեստավորվի, եթե դատարանը չի հաստատել մեղադրանքը այս կամ այն ծննդկանի մահվան համար: Բավական չէ, որ նրանց չեն կալանավորել,   մեղադրյալի կարգավիճակով ու հոգեվիճակով շփվում են հիվանդների հետ: Հիմա էլ՝ թեստավորում ,- դժգոհում էին  հարազատները:
 
Հարազատները մտավախություն ունեն նաև, որ թետավորումն օբյեկտիվ չի լինի` բժիշկների հանձնաժողովը քննությունից «չի կտրի» իր կոլեգաներից ոչ մեկին՝ այդ կերպ ապացուցելով նրանց որակյալ մասնագետ լինելը: 
 
Առողջապահության նախարարությունը տեղյակ էր  հարազատների բողոքին, որի հեղինակներն առաջարկում էին նրանց թեստավորել  դատական գործընթացից հետո: Ավելին` տեղեկություններ կային, որ նախարարության  ղեկավար կազմից որոշ  անդամներ արդարացի ու տրամաբանական  էին համարում ծննդկանների  հարազատների  բողոքը:  Նախարարությունը, սակայն, չընդառաջեց հարազատների բողոքին: Ավելին` մինչ օրս անհասկանալի է, թե ինչու  են թույլ տալիս  ծննդկանների համար  մեղադրվող գինեկոլոգներին  շարունակել աշխատել: 
Մինչդեռ արդյո՞ք ժամանակը չէ՝ վերացնելու այս համակարգում առկա մի բացթողում ևսինչո՞ւ ոչ մեկը չի մտածում բժիշկների լիցենզավման կարգս սահմանել, հսկել նրանց  գործունեությունը, իսկ հարկ եղած դեպքում` զրկել դրանից: Սա զգոնությունը բարձրացնելու լավագույն խթան կլինի: