Մայրության և գեղեցկության օրը, որը նաև այսպես կոչված կանանց միամսյակի ավարտն է, լրագրողներին հանդիպման էին հրավիրել պաշտպանության համակարգում աշխատող կանայք: Հայուհիներ, ում համար հայրենիքին ծառայելը հոգու պարտք է և ովքեր հպարտությամբ են կրում զինվորական համազգեստը:

 

ՀՀ ՊՆ  իրավաբանական վարչության  իրավական  ապահովման բաժնի ավագ սպա, փոխգնդապետ Նարինե Կարապետյանն այսօր լրագրողների հետ հանդիպմանն անդրադարձել է  ռազմական ոլորտում կանանց դերին:  Նրա խոսքով`  այս բնագավառում տարեցտարի  ավելանում է կանանց ներգրավվածությունը

 

-Պետք է շատ կազմակերպված լինել, որ կարողանաս ընտանիքդ համատեղել  աշխատանքի հետ,- ասաց բանախոսը: 

 

ՀՀ ՊՆ մարշալ Արմենակ Խանփերյանցի անվան  ռազմական ավիացիոն համալսարանի  կուրսանտ Գալինա Կարապետյանն էլ ասաց, որ  սերը զինվորական հագուստի հանդեպ նրան տարավ ռազմական ոլորտ: 

 

-Ընտանքիս էլ դեմ էր, որ սովորեմ, բայց ես գնացի այդ ճանապարհով: Դժվար էր կորտրել այն կարծրատիպը  տղամարդկանց շրջանում, որ կինը  տեղ չունի բանակում: Կինը կարող է հավասար կերպով ծառայել տղամարդկանց հետ,- ասաց նա: 

 

Հարց հնչեց կանանց  պարտադիր   զինծառայության մասին:  Այս հարցը  առանձնակի հնչեղություն է ստացել 2016-ի  ապրիլյան պատերազմից հետո:   Նարինե Կարապետյանի հավաստիացմամբ՝ սոցիոլոգիական հարցումները ցույց են տվել, որ հանրությունը պատրաստ է կանանց պարտադիր զինծառայության: 

 

-Այլ հարց է, որ պետք է ավելացնել պայմանագրային հիմունքներով ծառայող  կանանց  թիվը զինուժում,- եզրափակեց բանախոսը: