ԿԱՆԽԱՐԳԵԼՈՒՄՆ ԱՎԵԼԻ ՕԳՏԱՎԵՏ Է
Տղամարդիկ ևս կպաշտպանվեն
Արդեն տասը տարի է, որ եվրոպական զարգացած երկրները պայքարում են այս վիրուսի կանխարգելման դեմ: Մասնագետները հայտնաբերել են նոր պատվաստանյութ, որը բարձրացնում է օրգանիզմի դիմադրողականությունը պապիլոմա վիրուսի դեմ և հնարավորություն է տալիս 98 տոկոսով կանխարգելել պապիլոմա վիրուսով պայմանավորված քաղցկեղի առաջացումը:
Պարզվում է՝ արգանդի վզիկի քաղցկեղի առաջացման պատճառներից մեկը պապիլոմա վիրուսային վարակն է: Պապիլոման բարորակ ուռուցք է, որն առաջանում է մաշկի մակերեսին ու լորձաթաղանթի վրա: Դրանք հիմնականում ունենում են կլորավուն ձև, լինում են մարմնագույն կամ բաց շագանակագույն երանգով:
Հայաստանում, ըստ մասնագետների, ևս տարածված է արգանդի վզիկի քաղցկեղը, որը մեր երկրում ամեն տարի ավելի քան 150 կնոջ մահվան պատճառ է դառնում: Տարեկան 300 կնոջ մոտ ախտորոշվում է արգանդի վզիկի քաղցկեղ: Այն իր տարածվածությամբ չարորակ նորագոյացությունների շարքում գրավում է երկրորդ տեղը` կրծքագեղձի քաղցկեղից հետո: Դրա դեմն առնելու նպատակով պետական մարմինները, հանձին Առողջապահության նախարարության, հավանաբար, այս տարվա սեպտեմբերից պետպատվերով կիրականացնեն պատվաստում պապիլոմա վիրուսի դեմ:
ՀՀ իմունականխարգելման ազգային ծրագրի ղեկավար Գայանե Սահակյանի հավաստմամբ՝ եվրոպական 28 երկրում իրականացված փորձը ցույց է տալիս, որ պատվաստանյութի կիրառման արդյունավետությունը բարձր է, երբ դեղամիջոցն օգտագործվում է 9-13 տարեկան աղջիկների շրջանում:
Ւնչո՞ւ այդ տարիքում: Ըստ առողջապահության փոխնախարար Սերգեյ Խաչատրյանի՝ 9-13 տարեկան աղջիկների օրգանիզում հորմոնային փոփոխություններ սկսված չեն լինում: Առողջապահության նախարարության խնդիրն է կանխել վիրուսի տարածումը, ինչի արդյունքում տղամարդիկ ևս զերծ կմնան այդ վիրուսով վարակվելուց, ու նաև նվազագույնի կհասցվի դրա տարածման հնարավորությունը:
Ուսումնասիրությունները ցույց են տալիս, որ այդ վիրուսը հանդիպում է ակտիվ սեռական կյանքով ապրողների շրջանում: Հարց է ծագում՝ կարո՞ղ են վարակակիրները ևս պատվաստվել: Պարզվում է՝ կարող են, բայց պատվաստանյութի կիրառումը ոչ թե կկանխարգելի հիվանդությունը, այլ կկասեցնի դրա հետագա զարգացումն ու խորացումը: Մասնավորապես, եթե վիրուսը հանգեցրել է նախաքաղցկեղային վիճակի, ապա հիվանդությունը չի զարգանա պատվաստանյութի օգտագործման շնորհիվ:
- Հայաստանը կարո՞ղ է պետբյուջեի միջոցներով իրականացնել ծրագիրը:
Առողջապահության փոխնախարար Սերգեյ Խաչատրյանի խոսքով՝ մեր երկրի բյուջեի միջոցներով առայժմ չենք կարող նման ծրագիր իրականացնել, քանի որ մեկ բաժին պատվաստանյութն արժե 100 դոլար: Երկու տարի ծրագիը կիրականացվի պատվաստումների և պատվաստանյութերի գլոբալ դաշինքի աջակցությամբ: Դրանից հետո պետք է մեր միջոցներից գումարներ նախատեսել ծրագիրը շարունակելու համար:
