Կառավարության շենքի դիմաց երեկ բողոքի ցույց էին անում տոնավաճառների աշխատակիցները՝ գործադիրից պահանջելով իրենց ազատել բնութագրմամբ «հարկային ստոգումների տեռորներից»: Ցույցի մասնակիցներին զայրացնում է, որ հարկային տեսուչներն իրենցից ներմուծման փաստաթղթեր են պահանջում, ինչպես նաև՝ գնորդներին ՀԴՄ կտրոններ տրամադրել: Բողոքի ալիքն այնքան մեծ էր, որ բողոքավորներին լսելու իջավ վարչապետի օգնականը: Նա հայտարարեց, որ կառավարությունը խոստացել է՝ ՊԵԿ-ի տոնավաճառային հսկողության պատճառով առևտրականները չեն տուգանվի: Պարզապես կլինի գործունեության վերահսկում:
Առաջին անգամ չէ, որ ՓՄՁ ներկայացուցիչները հարկային մարմինների գործունեության դեմ դժգոհում են բողոքի ակցիաներով: Հիշենք 2015-ին շրջանառության հարկի դեմ բողոքի ակցիաները, երբ պահանջում էին իրենցից փաստաթղթեր չպահանջել:
Փաստորեն փաստաթղթեր պահանջելու խնդիրը նորից արդիական է:
-Մեզանից ներմուծման թուղթ են ուզում, բոլոր աշխատողներին, ասում են, գրանցեք, նախազգուշացնում են տուգանելու մասին: Ամսական 30-40 հազար հարկ ենք վճարում՝ ավելին են ուզում։ Թող թողեն՝ մանրերը շնչեն, թող խոշորներից էլ ներմուծման թուղթ ուզեն. ինչի՞ չեն ուզում, բարեկամ, ծանոթ, խնամի են՝ այդ պատճառով,- դժգոհում էին տնտեսվարողները:
Համաձայնենք, որ հարկային վարչարարությունը միշտ չէ, որ նպաստում է օրինականության հաստատմանը և կիրառվող ոչ բոլոր քայլերն են թափանցիկ ու շիտակ ճանապարհ հարթում նպատակների համար: Չհամաձայնել չենք կարող նաև այն ընդվզման հետ, որ հարկային պահանջատիրության թիրախում միշտ փոքր և միջին ձեռնարկություններն են:
Ի պատասխան այս ցույցի՝ ՊԵԿ-ը, թերևս, առաջին անգամ հրապարակավ հայտարարել է, թե բողոքն ուղղորդված է: Իհարկե, չի մասնավորեցրել, թե ում կողմից է այն ուղղորդված, ինչը հուշում է, որ ՊԵԿ-ին զայրացնում է հարկատուների ընդվզումը: Ի՞նչ նկատի ունեն՝ բողոքն ուղղորդված որակելով: Արդյո՞ք ոչ այն, որ միգուցե իրենց կողմից ոչ ճիշտ մոտեցումներ են դրսևորվել և դրանք կուտակվելով՝ ճաքեցրել են համբերության բաժակը: Սա՝ հումորով, իսկ եթե լուրջ, ապա ուղղորդում, իհարկե՛, կա: Բայց ոչ թե կամ ոչ միայն անձերի, այլ՝ օրենքի տեսքով: Օրենք, որը տարիներ շարունակ խախտվել է, մնացել թղթի վրա, իսկ այսօր կառավարությունը փորձում է կյանքի կոչել:
Եվ մի՞թե ստվերի դեմ պայքարող կառավարության համար պարզ չէ, որ պայքարը պետք է այնպես լինի, որ ստվերի հարվածի տակ չհայտնվեն միայն ՓՄՁ ներկայացուցիչները: Առանց այդ էլ հարկային համակարգը դեռ այնպիսի «սարդոստայններ» ունի, որոնց ցանցում վերջնականապեց չխճճվելու, դրանցից գլուխ հանելու համար ՓՄՁ-ի ներկայացուցիչը լրացուցիչ մասնագետներ է պահում ու դրա հետ մեկտեղ փորձում օրվա հացի խնդիր լուծել:
Այն, որ ստվեր կա տոնավաճառների ոլորտում՝ չենք հերքի: Բայց ստվերի դեմ պայքարը պետք է սկսել ոչ թե իրենց օրվա հացը մի կերպ վաստակող, իրենց վերադասի հանդեպ պարտավորությունները կատարողներից, այլ խոշոր «գլուխներից», ինչպես նաև մաքսակետերից:
ՀԳ. Թե որքանով կառավարությունը կկատարի իր խոստումն ու կշրջանցի ՓՄՁ ներկայացուցիչներին՝ ժամանակը ցույց կտա: Բայց ողջունելի է, որ վարչապետը ձեռնամուխ է եղել խաղի հավասար կանոններ սահմանել, ստվերի դեմ իրական ու իրատեսական պայքարել՝ երկրի տնտեսական խորը ճգնաժամը գոնե մեղմելու համար:
