«ՇԱՆՏՂՈՒԹՅՈՒՆԸ» ՇԱՐՈՒՆԱԿՎՈՒՄ Է

Բոյկոտել՝այլընտրանք առաջարկելով

Արդեն մի քանի օր  է, որ սոցցանցերում քննարկում են գյուղմթերք արտադրող թուրքական ընկերություններից մեկի ղեկավարի հայտարարությունը, համաձայն որի` իրենք արտադրում են երկու տեսակ լոլիկ՝ մի մասը մշակում են բնական ճանապարհով՝ տեղական սպառողի համար, իսկ մյուս մասը նախատեսված է արտահանման համար: Թե ինչով են դրանք տարբերվում միմյանցից, թուրք արտադրողն ասել էր.
 
-Այն մասը, որն արհեստական ճանապարհով է աճեցվում ու թունավոր սրսկումներ է պարունակում, մենք վաճառում ենք ոչ բարեկամ ժողովուրդներին, ինչպիսիք են հայերը, քրդերը: Բնական է, որ մենք չենք կարող վտանգել մեր ապագա սերնդին` նման արտադրանք հրամցնելով:
 
Հայտարարությունն անարձագանք չմնաց: Սոցցանցերում անմիջապես քննարկումներ սկսեցին, նորից առաջարկներ հնչեցին թուրքական ապրանքները բոյկոտելու մասին: Սննդամթերքի անվտանգության ծառայությունը անմիջապես հանգստացրեց  սպառողներին:

- ՀՀ ԳՆ սննդամթերքի անվտանգության պետական ծառայությունն արդեն հայտարարել էր, որ ՍԱՊԾ սահմանային հսկիչ կետերի տվյալներով՝ Թուրքիայից Հայաստան այս տարվա ընթացքում լոլիկ չի ներկրվել: Այդուհանդերձ, ծառայությունն իրացման շուկայում պարբերաբար ուսումնասիրություններ է իրականացնում՝ պարզելու նպատակով, թե որքանո՞վ է անվտանգ շուկայում իրացվող լոլիկը,-հայտարարել էր պետական կառույցը: 

Հարց է առաջանում՝  եթե անհանգստանալու հիմք  չկա, ապա ինչու պետք է թուրք արտադրողը նման  վստահ հայտարարություն աներ: Մի՞թե չէր գիտակցում, որ սրանով  հարվածի տակ է դնում իր բիզնեսը:  Իհարկե, այլ վարկած էլ կարող ենք առաջ քաշել: Այն, որ եվրոպական երկրների համեմատ Հայաստանում վերահսկողական գործառույթները, չափանիշներ այդքան էլ խիստ չեն, հետևաբար կարելի է ցանկացած խոտան առաքել հարևան երկիր:

Երկրորդ՝ պատկան կառույցը, ըստ խնդրին քաջատեղյակների, կարծես հերքում է ինքն իրեն:

Ծառայությունը մի կողմից խոսում է, որ Հայաստանի տարածք, իրենց տվյալներով, չի ներմուծվել թուրքական լոլիկ, մյուս կողմից խոսում է իրացման ցանցում առկա լոլիկի մոնիթորինգի մասին` առանց հայտարարության` արդյո՞ք փորձել է սպառվել թուրքական լոլիկը, թե` ոչ: Եթե փորձել է պարզել, որ թուրքական է լոլիկը, ապա ինչո՞ւ պետական որևէ կառույցի չեն տեղեկացրել այդ մասին: Այսինքն` նրանք շատ լավ տեղյակ են, որ վաճառվում է թուրքական լոլիկ, բայց խոսում են, որ տեղյակ չեն: Եթե տեղյակ չեն, ապա ինչո՞ւ են ուսումնասիրություն իրականացնում: Ինչ ասել է` երաշխավորված է, այն էլ այն դեպքում, երբ իրենք մյուս կողմից ասում են, որ չգիտենք` ներմուծվել է, թե` ոչ,- հակադարձել էր  սպառողների խնդիրներով զբաղվող  Բաբկեն Պիպոյանը:

Թուրքական լոլիկը բավական չէր, այսօր էլ լուսանկար հրապարակվեց Հայաստան մուտք գործած ադրբեջանական խնձորների մասին: Պատկան կառույցը հայտարարեց, որ ուսումնասիրում են արտադրանքը:

Որակյալ սննդամթերքի մասին  վարչապետ Կարեն Կարապետյանն էր խոսել: Բարձիթողի վիճակը որակելով«շանտղություն»՝ գործադիր մարմնի ղեկավարը պատկան կառույցին հորդորել էր ստուգել հանրությանը մատուցվող   սննդի որակը:

Դրանից  առաջ էլ Էկոնոմիկայի  նախկին նախարար Արծվիկ Մինասյանը հայտարարել էր, որ  բոլոր այն  ապրանքները, որոնք չեն բավարարելու   որակական հատկանիշներին,  եթե  մուտքը վերացնում կամ սահմանափակում է տեղական արտադրությունը,  դուրս հանել շուկայից: Այդ ապրանքները հայկական շուկայից հանել հնարավոր չէ, քանի որ, ըստ Մինասյանի, կմտնեն ԵՏՄ-ի տարածք եւ այնտեղից առանց որեւէ հավելյալ մաքսավճարի, կտեղափոխվեն Հայաստան:  Անցել է արդեն մի քանի ամիս, սակայն  Էկոնոմիկայի նախարարությունը  դեռ լռում է:

Ի վերջո ի՞նչ լուծում է առաջարկվում՝ բացի տարատեսակ չափորոշիչներ մշակելուց: Կարծում ենք՝ հարկավոր է  այլընտրանք(ներ) առաջարկել՝ խթանելով տեղական արտադրանքը: Բայց քանի որ տեսականորեն հնարավոր չէ ամեն ինչ արտադրել, ինքնաբավ լինել, գոնե սպառողների գիտակցությունն այնքան բարձրացնել, որ թուրքական ապրանքի փոխարեն այլ երկրի արտադրանք  սպառի: Գոնե՝ սննդամթերքի պարագայում, քանզի մեր ոխերիմ հարևանն ինքն է խոստովանել, որ գյուղմթերքը հատուկ թունավորում են ոչ բարեկամ երկրների համար: