Փաստաբանները  պատգամավորներից ոչնչով չեն տարբերվում. երեկ այս բովանդակությամբ գրառումներ  կային սոցցանցերում: Իսկ պատճառը փաստաբաններ Տիգրան Աթանեսյանի և Արմեն Սողոմոնյանի վրա հարձակումն էր:

 

Ի՞նչ է եղել իրականում՝ հավանաբար կպարզի քննությունը: Առայժմ կողմերը միմյանց են մեղադրում: Իսկ այսօր դեպքի մասին մանրամասներ է ներկայացրել  հարձակվող կողմը` փաստաբանների դպրոցի տնօրեն Սիմոն Բաբայանը: 

 

Նրա խոսքով` Տիգրան Աթանեսյանը երկար ժամանակ վիրավորել է իրեն, հրապարակավ սեռական հայհոյանքներ է հնչեցրել իր և իր ընտանիքի հասցեին:  Վրդովված այդ ամենից` ինքը և մեկ այլ փաստաբան՝ Արսեն Հարությունյանը (ում հետ միասին աշխատում են) որոշում են գնալ Տիգրան Աթանեսյանի գրասենյակ` խոսելու ինչպես տղամարդը տղամարդու հետ: 

 

- Նպատակ չեմ ունեցել վիճաբանություն ու քաշքշուկ սարքելու, պարզապես հասկանալու, թե ինչու է Տիգրան Աթանեսյանը նման պահվածք դրսևորել: Առաջին հայհոյհողն ու հարվածողը Տիգրան Աթանեսյանն է եղել:  Երբ գնացինք Տիգրան Աթանեսյանի  գրասենյակ,  այնտեղ մի աղջիկ կար: Նրան խնդրեցինք դուրս գալ, սակայն նա   դուրս չեկավ: Երբ պարզաբանում  պահանջեցինք Տիգրան Աթանեսյանից, նա հակադարձեց ինձ,  հարվածեց ինձ ու Արսեն Հարությունյանին:   Հարվածն այն աստիճանի էր, որ Արսեն Հարությունյանը դիմածնոտային կոտրվածք  ստացավ: Նրան տարա  հիվանդանոց, ու պարզվեց` ես ու Արսեն Հարությունյանը վնասվածքներ ունենք,- մանրամասնեց փաստաբանների դպրոցի տնօրենը: 

 

Փաստաբանների դպրոցի տնօրեն ի խոսքով` Տիգրան Աթանեսյանի մոտ գնալու ճանապարհին հանդիպել են  Վրեժ Խաչիկյանին ու Գևորգ Մկրտչյանին, ովքեր  նույնպես որոշել են ուղեկցել նրանց:

 

Տնօրեն Սիմոն Բաբայանը հերքեց տեղեկությունները, թե  իրենք հարվածել են Արմեն Սողոմոնյանին, և՝ որ Վրեժ Խաչիկյանը փորձել է  ոտքով խեղդել նրան: 

 

Ասելը՝ ասաց, բայց ոչ մի կերպ չկարողացավ գտնել պարզունակ այն հարցի պատասխանը, որ եթե չեն հարվածել,  ապա  ինչպե՞ս է  պատռվածք ստացել:  

 

ՀԳ. Ինչո՞ւ և ինչպե՞ս կարող էին փաստաբանները  տղայական մակարդակով հարցեր լուծել, եթե գրեթե ամեն օր դատարաններում պայքարում են օրինականության համար, քարոզում`  խնդիրները լուծել  իրավական մակարդակով: Բայց արի ու տես, որ այսօր իրենք են դեմ գնում իրենց քարոզածին: Ու այսքանից հետո դժվար է  պատկերացնել`ապագա ա փաստաբաններ կրթող դպրոցի տնօրենն ինչպե՞ս պետք է համոզի առաջնորդվել միմիայն օրենքով: