Վարչապետի ակնարկը Տարոն Մարգարյանին
ԵՐԵՎԱՆԻՆ ԼՈՒՐՋ ՀՈԳԱԾՈՒԹՅՈՒՆ Է ՊԵՏՔ
ՀՀ վարչապետ Կարեն Կարապետյանն, այսօր շնորհավորելով Երևանի քաղաքապետ Տարոն Մարգարյանին, ասել է.
- Բոլորս միասին կաշխատենք, որ Երևանը դառնա ավելի լավը:
Այլ երկրներում միգուցե միասին աշխատելու մասին գործադիր մարմնի ղեկավարի այս հայտարարությանը դիտվեր որպես սովորական աշխատանքային խոստում: Մինչդեռ մեր իրականության մեջ վարչապետի այս խոսքերն ավելի շատ որպես ակնարկ են ընկալվում:
Բանն այն է, որ վարչապետը չի կարող անտեղյակ լինել Երևանի ավագանու ընտրություններում կիրառված վարչական, ֆինանսական ռեսուրսին, որի հաշվին Տարոն Մարգարյանը վերընտրվել է: Գործադիր մարմնի ղեկավարն իր խոսքով ակնարկում է՝ ընտրության արդյունքներով չարժե ուրախանալ, քանի որ ծանր աշխատանքը դեռ առջևում է. քաղաքապետարանի գործունեությունը կառավարության մանրադիտակի տակ է լինելու: Կկարողանա՞ Տարոն Մարգարյանը վերափոխվել և վերափոխել քաղաքը՝ բարի, չի՞ կարողանա՝ ուրեմն հրաժեշտ կտա իր պաշտոնին:
Իսկ որ քաղաքապետարանի աշխատանքի իրական գնահատականը հեռու է քարոզարշավի ընթացքում յուրայինների շուրթերով հնչող գովեստներից՝ նույնիսկ գովաբանողները լավ գիտեն: Վկա՝ անցած ծանրաշունչ ձմռան ընթացքում սառցապատ փողոցներում, համարյա գոյություն չունեցող մայթերին գայթող երևանցիների անեծքախառն հիշոցները...
«Բոլորս միասին կաշխատենք» նախադասությունը նաև մեկ այլ երանգ է պարունակում: Մոտ 1 տարի աշխատելով Երևանի քաղաքապետ՝ Կարեն Կարապետյանը լավագույնս պատկերացնում է կառույցի թույլ և ուժեղ կողմերը, Երևանի խնդիրներն ու առաջնահերթությունները: Իհարկե նաև՝ դրսից անտեսանելի մսխումների «որմնախորշերը» :
Եթե մինչ Կարեն Կարապետյանի վարչապետ նշանակվելը Տարոն Մարգարյանը համարում էր, որ կարող է միանձնյա լուծել ցանկացած հարց, գործադիր մարմնի ղեկավարն հակառակն է ակնարկում: Բավական է հիշել, որ մարդու իրավունքների պաշտպանների զեկույցներում մարդու իրավունքները ոտնահարող առաջին հնգյակում քաղաքապետարանն է: Ասել թե՝ Տարոն Մարգարյանն իր թիմով միանձնյա չի կարող Երևանն ավելի լավը դարձնել:
