Արդեն  մի քանի տարի է, որ Երևանի քաղաքապետ Տարոն Մարգարյանմ ԱԺ-ում բյուջեի քննարկմանը չի մասնակցում: Հարցն անգամ պատգամավոր Նիկոլ Փաշինյանն էր բարձրացրել, բայց  հստակ պատասխան  չէր ստացել: 

 

Այսօր լրագրողները Երևանի փոխքաղաքապետ Կամո Արեյանին հարցրեցին՝ ինչո՞ւ է ամեն անգամ նա գալիս ԱԺ՝ Տարոն Մարգարյանի փոխարեն: 

Կամո Արեյանը պատասխանեց, որ ժամանակացանկով հստակ գրված է՝ հրավիրվում է քաղաքապետի առաջին տեղակալը և զեկուցող է նշանակված քաղաքապետի առաջին տեղակալը:

 

- Տարոն Մարգարյանի բացակայությունները եղել են հարգելի,- ասաց Արեյանը:

 

Միգուցե  Տարոն Մարգարյանը բանավեճի՞ց է խուսափում:

 

Փոխքաղաքապետը հերքում է այս կարծիքը՝ 

 

-Ոչնչից էլ չի խուսափում:

 

Լրատվամիջոցներին հետաքրքիր էր նաև Կամո Արեյան պաշտոնյայի երկարակեցության  գաղտնիքը: Մի՞թե նա  անփոխարինելի է, չկա՞ երիտասարդ կադր: Ի պատասխան Կամո Արեյանն ասաց, որ  նարցիսիզմ հիվանդությամբ չի տառապում, ինքնասիրահարված չի.

 

- Անում եմ իմ աշխատանքը, անում եմ պատասխանատվությամբ և երբեք չեմ փակել որևէ երիտասարդ կադրի ճանապարհը, որովհետև միշտ մտածել եմ և մտածում եմ, որ պիտի գա ինձնից ավելի կատարյալը ու պիտի գա նա հաստատ:

 

Պիտի գա ու չի՞ գալիս, թե՞ պիտի նշանակեն ու չեն նշանակում...

Հարց հնչեց նաև տրանսպորտի վիճակի մասին: Լրատվամիջոցներից մեկը հիշեցրեց, որ Կամո Արեյանն ասել էր՝ տրանսպորտի վարչության պետ Հենրիկ Նավասարդյանի ծառայողական մեքենան կվերցնի, որ տրանսպորտով մի-երկու օր երթևեկի, խնդիրները հասկանա: Կամո Արեյանը պատասխանեց. 

 

- Ես տենց ղալաթ չեմ խոստացել: Ես իմ խոսքերը լավ հիշում եմ, ես նման բան չեմ խոստացել՝ կնստի, կիջնի, իր՝ չինովնիկի իրավունքն է: 

 

Հավանաբար իսկապես «տենց ղալաթ» չէր էլ «խոստանա». ո՜նց կարող էր այդքան դաժան վարվել գործընկերոջ հետ: Իրենց նմաններին ի՜նչ վայել է հանրային տրանսպորտը: Ինչպես մեր տատերը կասեին՝ իրենց նմանների պորտը պետական ու սեփական հարմարավետ ավտոմեքենաների մեջ են կտրել: