Կենտրոն և Նորք-Մարաշ վարչական շրջանների ընդհանուր իրավասության դատարանում այսօր տեղի ունեցավ Նորք-Մարաշի զինված խմբի գործով դատավարությունը՝ դատավոր Արմեն Բեկթաշյանի նախագահությամբ:

 

Դատավոր Արմեն Բեկթաշյանը հայտարարեց, որ գործում նոր մեղադրող դատախազ է ներգրավվել: Խոսքը Էդգար Ասատրյանի մասին էր: Դատարանում հնչեցրին նաև նիստերից բացակայողների անունները, սակայն նիստերի դահլիճից հեռացված Վահան Շիրխանյանի անունը դատավորը չհնչեցրեց: 

 

Հիշեցնենք, որ Վահան Շիրխանյանի նկատմամբ դատական սանկցիա է կիրառվել, և վերջինս երեք ժամով հեռացվել է դատական նիստերի դահլիճից: 

 

Վ. Շիրխանյանի պաշտպան Հայկ Ալումյանը դիտողություն արեց դատարանին՝ իր պաշտպանյալի անունը չի հնչեցվում, իսկ ձայնագրությունը հետագայում լսողները կկարծեն, թե  Շիրխանյանը նիստերի դահլիճում չի եղել: 

 

Ամբաստանյալի անունը չհնչեցնելու պատճառն ասելու կամ իր վրիպումն ուղղելու փոխարեն դատավորը պաշտպանին պատասխանեց, թե Վահան Շիրխանյանը փորձում է ձգձգել դատական նիստը: Հայկ Ալումյանը համաձայն չէր: Նրա խոսքով՝ նախորդ դատական նիստին դատավորը հեռացրեց իր պաշտպանյալին, որից հետո դատական նիստը ձախողվեց:  Հայկ Ալումյանը միջնորդեց դատարանին իր պաշտպանյալին դատարանի դահլիճ բերել: 

 

- Դատարանը շատ լավ գիտի՝ եթե պարոն Շիրխանյանը դատարանում չէ, ես ևս չեմ լինելու այստեղ: Շատ լավ իմանալով դա՝ դատարանն այս վիճակն է ստեղծում: Դատարանը շատ լավ գիտի, որ Վահան Շիրխանյանը ոտքի վրա չի կարողանում  կանգնել: Ու դա որակելով անհարգալից վերաբերմունք՝ ստեղծեց այս վիճակը: Հիմա էլ ուզում եք տպավորություն ստեղծել, թե պարոն Շիրխանյանն է ձախողում դատական նիստերը: Էպիկրիզից լավ երևում է, որ պարոն Շիրխանյանը չի կարողանում ոտքի վրա կանգնել, և Դուք սրա համար նրան հանեցիք դատական նիստերի դահլիճից և այդ  օրը դատական նիստը ձախողեցիք: 

 

- Մի վիրավորեք ոչ մեկին: Փորձագետի եզրակացություն կա, որ նա կարողանում է կանգնել,- վրդովված արձագանքեց դատավորը:

 

- Ես պահանջում եմ, որ իմ պաշտպանյալը բերվի այստեղ,- նորից պնդեց Ալումյանը:

 

- Երեք ժամը կլրանա՝ կբերենք,- ասաց Բեկթաշյանը:

 

- Երեք ժամը վաղուց է լրացրել: 

 

- Նստե՛ք, պարոն Ալումյան: 

 

Դատավորի մերժումից հետո Ալումյանն ասաց, որ լքում է նիստերի դահլիճը:

 

- Դա ձեր իրավունքն է,- արձագանքեց դատավորը:

 

- Շնորհակալություն՝ իմ իրավունքը պարզաբանելու համար.- փորձեց բարեկրթություն ցուցաբերել Ալումյանն ու դուրս եկավ դահլիճից: 

 

Դատավորին դա զայրացրեց: Նրա խոսքով՝ դատական նիստը շարունակվում է, իսկ պաշտպանը հեռանում է: 

 

Դատական նիստը նորից հետաձգվեց՝ մինչև հուլիսի 21-ը: