Առևտրականների 90 տոկոսը վարկերի ու պարտքերի տակ է
ՄՏԱՎԱԽՈՒԹՅՈՒՆ ՈՒՆԵՆ, ՈՐ ՓՈՂՈՑՈՒՄ ԿՀԱՅՏՆՎԵՆ
Առաջին հայացքից կենցաղային թվացող առօրեական մի դրվագ է այն, ինչը նորից փոթորկել է մի խումբ երևանաբնակների, և ինչն, ավաղ, վերստին փաստում է ազգաբնակչության անվստահությունը` այս պարագայում մայրաքաղաքի իշխանության նկատմամբ:
Երևանի «Ֆիրդուսի» շուկայի առևտրականները և թաղամասի բնակիչներն այսօր Կառավարության շենքի առջև էին: Նրանք ցանկանում էին հանդիպել վարչապետ Կարեն Կարապետյանին և ներկայացնել իրենց խնդիրը.
- Երկու օր է` անգործ, անբան… Առևտրականների 90 տոկոսը վարկերի ու պարտքերի տակ է, չէր կարելի նման ձևով վարվել,- ասաց բողոքի ակցիայի մասնակից առևտրականներից մեկը:
Հիշեցնենք, որ հուլիսի 19-ին ոստիկանական ուժերի ու Երևանի քաղաքապետարանի աշխատակիցների և հատուկ տեխնիկայի միջոցով սկսվել է Երևանի կենտրոնում գտնվող «Ֆիրդուսի» շուկայի ապամոնտաժումը, որը շարունակվում է նաև այսօր:
Այս շուկայում առևտրով զբաղվողները քաղաքապետարանից մինչև դեկտեմբեր ժամանակ էին խնդրել, որպեսզի հասցնեն ապրանքն իրացնել, որից հետո միայն ազատեն տարածքը:
Սակայն մայրաքաղաքի իշխանություններն չընդառաջեցին ֆիրդուսցիների խնդրանքին: Սա այն դեպքում, երբ բնակիչները, առևտրականները հիասթափված հայտարարում էին, թե ընտրել են Տարոն Մարգարյանին, ու նա հիմա իրենց հետ այդպե՞ս է վարվում:
Ընդդիմադիրներն էլ առիթը բաց չեն թողել և սոցիալական ցանցերում արդեն հանդիմանանք են հնչեցնում, թե` լավ է, որ խոստովանում են, որ ընտրել են մի քաղաքական ուժի` ՀՀԿ ներկայացուցչին, որն այսօր իր քաղաքացիների հետ այսպես է վարվում:
- Թե չէ միայն մեղքը բարդել ԿԸՀ նախագահ Տիգրան Մուկուչյանի վրա, ճիշտ չէ,- գրել են ընդդիմադիրները:
Առևտրականներին քաղաքապետարանն առաջարկել է տեղափոխվել «Երևան» տոնավաճառ, «Առինջ մոլ», սակայն այդ շուկաներում վարձավճարները բարձր են:
«Ֆիրդուսի» շուկայի տարածքին կից ապրողները ևս մտավախություն ունեն, որ իրենց էլ բնակարաններից դուրս կհանեն, գցեն փողոց և փոխհատուցում էլ չեն տա: Նրանք Կառավարությունից պահանջում են, որ իրենց հետ պայմանագրեր կնքեն, որպեսզի չնչին փոխհատուցում չստանան իրենց տների դիմաց` ինչպես թաղամասի նախկին բնակիչներից շատերի հետ եղավ:
