ԸՆՏՐԱԿԱՇԱՌՔ
պատմվածք
Ֆարիդ Գուրգենի ԳՐԻԳՈՐՅԱՆ
Բանասեր, զինվորական, թարգմանիչ, բառարանագիր, գրող, սցենարիստ, աստվածաբան
Ավարտել է Երևանի պետական համալսարանի բանասիրական ֆակուլտետը:
25 տարի ծառայել է ԽՍՀՄ Զինված ուժերում: Ներկայումս ռազմագիտություն է դասավանդում Երևանի Ա. Շավարշյանի անվան N 40 դպրոցում:
Հեղինակ է բազմաթիվ գրքերի` բառարաններ, հանրագիտարաններ...
Ֆ. Գրիգորյանը հեղինակ է նաև հոգևոր թեմաներով գրքերի, որոնց մի մասն անտիպ են` «Աստվածաշնչի հանրագիտարան» (12 հատոր), «Աստվածաշունչը և հայ իրականությունը», «Հիսուս. կյանքը և գործունեությունը 4 ավետարանների հենքի վրա», «Եկեղեցական խորհուրդներ»:
Տպագրության է պատրաստ «Դիակը ցուցմունք է տալիս» վիպակի հիման վրա 85 սերիանոց ֆիլմի սցենարը: Արժեքավոր թարգմանություններ է կատարել լեհերենից (Բ. Պրուս «Անիծված երջանկություն) և ռուսերենից («Սառցահատը»):
Գարուն էր: Ապրիլի սկզբները: Այստեղ-այնտեղ ծաղկած ծիրանիներն ու բալենիներն աչք էին շոյում: Մարդիկ նայում էին բնության հնարքներին ու հիանում:
Երեկո էր: Բարձրահարկ շենքի միակ մուտքը երիտասարդ մի զույգ մտավ: Վերելակով բարձրացան վերջին հարկ: Սեղմեցին նախ աջ, ապա ձախ կողմի բնակարանների դռան զանգերը: Բացող չեղավ: Եվ այսպես, հարկ առ հարկ ոտքով իջնելով, նրանք զանգեցին ու բախեցին բոլոր դռները: Մի տեղ բացեցին, ներս հրավիրեցին, մեկ այլ տեղ կոպիտ պատասխան տվեցին ու ճանապարհեցին, մի երրորդ տեղում նայեցին անցքից ու դուռը չբացեցին, մի չորրորդում…
Այսպես նրանք իջան մինչև երկրորդ հարկ: Նախ ձախակողմյան դուռը ծեծեցին:
- Ո՞վ է,- լսվեց ներսից կանացի մի ձայն:
- Մենք ընտրական տեղամասից ենք: Ընտրողների հաշվառում ենք անցկացնում: Կարելի՞ է:
Դուռը կիսաբացվեց: Համոզվելով, որ այս զույգից բացի ուրիշ մարդիկ չկան, կինը ներս հրավիրեց:
Երիտասարդը ներկայացավ, ապա հարցրեց.
- Ձեր բնակարանում քանի՞ ընտրող կա:
- Երեք. ես, ամուսինս ու աղջիկս: Տղաս բանակում է:
- Շատ լավ,- ասաց երիտասարդը,- ձերոնց անձնագրերը կարո՞ղ եք բերել:
Ու ինչ-որ ցուցակներ շարեց սուրճի սեղանիկի վրա:
Կինը գրապահարանի մի դարակից հանեց անձնագրերն ու տվեց: Աղջիկը մեկ առ մեկ բացեց, համեմատեց իրենց ունեցած ցուցակների հետ, ինչ-որ նշումներ արեց, վերադարձրեց.
- Շնորհակալություն: Մի հարց էլ ունենք. ո՞ւմ պիտի ընտրեք:
Կինը վարանեց:
- Դեռ չեմ կողմնորոշվել: Թեկնածուներն այնքան շատ են և այնքան լավ խոստումներ են տալիս, որ եթե հնարավորություն ունենայի` բոլորին էլ կընտրեի:
Երիտասարդը ծիծաղեց:
- Շատ դիպուկ ասացիք: Մենք առաջարկում ենք ընտրել մեր թեկնածուին, որն ընտրացուցակում հինգերորդը կլինի: Եվ դրա համար մենք ձեզ կտանք տասը հազարական ռուբլի` յուրաքանչյուր ընտրողի համար: Ձեզ մոտ երեք անձ կա, ուրեմն` երեսուն հազար: Այսօրվա պայմաններում սա էլ ընտանիքը պահելու միջոց է:
- Հիմա եք տալո՞ւ,- հարցրեց կինը:
- Ո´չ: Մենք նշեցինք ձեր տվյալները: Ընտրությունից տասն օր առաջ մենք նորից կհանդիպենք ու գումարը կտանք: Համաձա՞յն եք:
- Այո:
- Այդ դեպքում ստորագրեք ձեր և ձեր ընտանիքի անդամների փոխարեն:
Կինը ստորագրեց:
- Իսկ չե՞ք ասի, ձեր դիմացի հարևանը տա՞նն է:
- Գայանե՞ն: Տանն է: Գնանք, ես ձեզ հետ կգամ:
Դուրս եկան աստիճանահարթակ: Կինը սեղմեց դռան զանգի կոճակը:
- Ո՞ւմ եք ուզում,- հարցրեցին ներսից:
- Ես եմ, Գայ ջան, Սրբուհին: Բաց արա:
Երկաթյա դուռը ճռնչալով բացվեց: Լայն միջանցքում ձեռքերը կողքերին կանթած կանգնած էր մոտ քառասունհինգ տարեկան Գայանեն ու հարցական նայում էր հարևանուհուն:
- Քեզ հյուրեր եմ բերել: Մեր ընտրական տեղամասից են:
- Ներս մտեք:
Սրբուհու հետևից բնակարան մտավ նաև զույգը: Աղջիկը ոտքը նոր էր ներս դրել, երբ սայթաքեց ու հազիվ կարողացավ իրեն պահել, որ չընկնի: Երիտասարդը հասցրեց բռնել նրան:
- Կներեք,- ասաց Գայանեն,- սպասուհին այնքան է փայլեցրել, որ չենք կարողանում կարգին քայլել:
Իսկապես հատակի այն մասը, որ ծածկված չէր գորգով, հայելու նման փայլում էր:
- Խնդրեմ, հանեք ձեր կոշիկները, հողաթափեր հագեք. դրանք չեն սահում:
Զույգը կոշիկները հանեց, հողաթափեր հագավ և իրար ձեռք բռնած առաջացավ: Հյուրասենյակում նստեցին առաջարկված գահավորակներին ու շուրջը նայեցին. իսկապես հարուստ կահավորանք էր, ճոխ պաստառներով ու բազմաթև ոսկեգույն ջահով:
Երիտասարդը սթափվեց. հարկ էր խոսել գործի մասին:
- Մենք ձեր ընտրատարածքից ենք և եկել ենք հաշվառելու բոլոր ընտրողներին:
- Իսկ դրա կարիքը կա՞,- հարցրեց տանտիրուհին:
- Անշուշտ: Մենք վկա ենք եղել այնպիսի արտառոց դեպքերի, երբ մարդը վաղուց մահացել է, իսկ նրա անունը դեռ ընտրացուցակների մեջ է:
- Յա˜... Իսկապես, լավ բան չէ,- ասաց Գայանեն:
Երիտասարդը ոգևորվեց.
- Ներկայացրեք խնդրեմ, ձեր ընտանիքի անդամների անձնագրերը: Մենք կհամեմատենք մեր ցուցակների հետ:
Տանտիրուհին ուղղվեց դեպի վերջին ոճով պատրաստված գրադարակների շարքը, որը բազմաթիվ գզրոցներ ու դռնակներ ուներ և որոնցից յուրաքանչյուրի վրա մի բանալի կար դրված:
Մինչ Գայանեն անձնագրերն էր հանում, Սրբուհին հարցրեց.
- Ինչ նման եք իրար: Քույր և եղբա՞յր եք:
- Ո´չ,- քմծիծաղեց երիտասարդը,- բոլորն էլ նույն բանն են հարցնում: Մենք ամուսիններ ենք:
- Որտե՞ղ է դրել,- ինքն իրեն քրթմնջաց Գայանեն, ապա չորս անձնագրերը տվեց երիտասարդին:
- Գիտե՞ք, ամուսնուս անձնագիրը չգտա,- ասաց,- միգուցե տարել է իր հետ:
- Իսկ պատճենը չունե՞ք:
- Չգտա:
- Լավ, մենք երկու օրից նորից կգանք:
Ու սկսեցին իրենց աշխատանքը:
- Սուրճ կխմե՞ք,- հարցրեց Գայանեն:
- Չենք հրաժարվի,- ասաց աղջիկը:
Տանտիրուհին խոհանոց մտավ: Քիչ անց դուրս եկավ սուրճի չորս բաժակներով, դրեց փոքր խաղասեղանի վրա, կոնֆետի տուփը բացեց ու սպասքապահարանից հանեց կոնյակի շիշը:
- Կոնյակ կխմե՞ք,- հարցրեց երիտասարդին:
- Օ˜, ոչ, շնորհակալություն, մենք աշխատանքի մեջ ենք, մեզ չի կարելի:
- Էհ, մենք աշխատանքի մեջ չենք, մեզ կարելի է,- ասաց Գայանեն ու մի լիքը բաժակ էլ տվեց Սրբուհուն:
Աղջիկը վերջացրեց իր աշխատանքը, անձնագրերը վերադարձրեց տանտիրուհուն` ասելով.
- Մեր այցելության նպատակներից մեկն էլ ընտրողների տրամադրությունների ճշտումն է: Դուք արդեն գիտե՞ք, թե ում եք ընտրելու:
Տանտիրուհին նստեց կարճ օթոցի վրա:
- Ամուսինս նախարարի աշխատակազմի ղեկավարն է, և նախարարն ում մատնացույց անի, նրան էլ կընտրենք:
- Շատ հաճելի է լսելը,- ասաց աղջիկը,- մենք առաջարկում ենք ընտրել այն թեկնածուին, որը ընտրացուցակում հինգերորդը կլինի: Եվ դրա համար առաջարկում ենք տասհազարական դրամ` յուրաքանչյուր ընտրողի համար: Ընտրությունից տասն օր առաջ մենք հիսուն հազարը կհանձնենք ձեզ: Հուսով ենք, որ մեր թեկնածուն կլինի հենց նա, ում մատնացույց կանի ձեր նախարարը:
- Իսկ եթե չհամընկնի՞:
- Աղջի Գայան, արի խոհանոց, բան եմ ասում,- հարևանուհու թևից քաշեց Սրբուհին:
- Լսիր, ի՞նչ նշանակություն ունի, կհամընկնի՞, թե՞ չէ: Քո համաձայնությունը տուր, փողը վերցրու. հիսուն հազարը մի տեղ պետք կգա: Երբ ընտրելու կգնաս, ընտրիր նրան, ում կցանկանաս: Հո չե՞ն գալու ստուգեն` հինգ համարին ընտրեցի՞ր, թե չորրորդ կամ վեցերորդ:
- Ինչի, այդպես կարելի՞ է. բա որ Բարսեղն իմանա: - Եթե դու չասես, Բարսեղը որտեղի՞ց պիտի իմանա:
- Համոզեցիր:
Ներս մտան հյուրասենյակ, և Սրբուհին գլխով արեց. համաձայն է:
- Ստորագրեք, խնդրեմ, այստեղ ու այստեղ: Վաղը չէ մյուս օրը նորից կայցելենք ձեր ամուսնու անձնագրի համար: Լավ կլինի պատճենահանեք: Իսկ ընտրություններից տասն օր առաջ դրամը կբերենք: Շնորհակալություն հյուրասիրության համար: Ցտեսություն:
Երիտասարդ զույգը հանգրվանեց մոտակա սրճարանում:
- Այսօր հիանալի աշխատեցինք, չէ՞,- ասաց երիտասարդը:
- Վատ չէր: Լսիր, Արսեն, ինչո՞ւ ասացիր, թե ամուսիններ ենք: Ես չուզեցի որևէ բան ասել, բայց… ի՞նչ է, ինձ ամուսնության առաջա՞րկ ես անում:
- Ի՞նչ վատ կլինի որ, Գոհար ջան: Վերջիվերջո երկուսով հիանալի ընտանիք կկազմենք: Համաձայն չե՞ս:
- Իհարկե, ամուսնության առաջարկն այդպես չեն անում,- մի փոքր կոտրատվեց Գոհարը,- բայց որ ասում ես…
Ամբողջ օրը ոտքի վրա լինելով, չէին հասցրել որևէ բան ուտել` չհաշված Գայանեի հրամցրած շոկոլադն ու սուրճը: Երբ մի քիչ հագեցան, Արսենն ասաց.- Տեսա՞ր ինչ կահկարասի ունեին: Լավ էր` չընկար, թե չէ ատամդ անպետք ոսկոր էր դառնալու:
- Տեսա: Շատ լավն էր: Ամուսինը նախարարի աշխատակազմի ղեկավարն է: Հիմա, երևի, մի տոննա փող կունենան, չէ՞:
Գոհարը չնկատեց, որ իր հարցով Արսենի գլխում այլ մտքեր ծնվեցին` մեկը մյուսից աներևակայելի, մեկը մյուսից անիրականանալի:
Երկու օր անց Արսենն ու Գոհարը նույն բազմահարկի շքամուտքը մտան, բարձրացան մինչև վերջին հարկը և թակեցին այն բնակարանների դռները, որտեղ երկու օր առաջ ոչ ոք դուռը չէր բացել:
Երկրորդ հարկում էլ Գայանեի բնակարանի զանգը տվեցին: Գայանեն դռան դիտանցքից նայեց, ճանաչեց ու բացեց դուռը:
Երբ ներս մտան, Արսենը կանգնած մնաց դռան մոտ:
- Գոհար ջան, դու ներս մտիր, ես այստեղ կսպասեմ: Մեկ էլ հատակը չկեղտոտեմ:
- Լավ:
Մինչ Գայանեն Գոհարին տվեց ամուսնու անձնագրի պատճենը, Արսենը ուշի-ուշով դռան փականն էր ուսումնասիրում: Հետո դռան բանալին հանեց, սեղմեց մի ձեռքում պահած օճառի վրա. դրոշմը լավ ստացվեց: Հետո բանալին մաքրեց իր թաշկինակով ու կողպեքի անցքի մեջ մտցրեց:
Գոհարն էլ իր գործն ավարտելով, դուրս եկավ:
Ընտրություններից տասն օր առաջ Արսենն ու Գոհարը նորից այցելեցին բազմահարկ շենքը` ընտրակաշառքը բաժանելու: Հինգ համարի տակ ընտրվող թեկնածուի գրպանից բավական մեծ գումար անցավ ընտրողների գրպանը:
Երկրորդ հարկում նույն գործողությունները կրկնվեցին: Միայն այն տարբերությամբ, որ այս անգամ Արսենն իր հետ բերած բանալու կրկնօրինակը փոխարինեց իսկականով: Դրանք այնքան նման էին նաև գույնով, որ իրականում դժվար էր տարբերելը…
(Շարունակելի)