Երևանի «Նարեկացի արվեստի միության» դահլիճում տեղի ունեցավ Իվան Անտոնյանի հեղինակային «Լոռու արվեստագետներ» ֆիլմաշարի՝ ՀՀ վաստակավոր լրագրող, «Լուսարձակ» թերթի գլխավոր խմբագիր, հինգ գրքի հեղինակ Ֆահրադ Ափուջանյանի կյանքին, անցած ճանապարհին և խմբագրական գործունեության 25-ամյակին  նվիրված ֆիլմի ցուցադրությունը: Ներկա էին հյուրեր ոչ միայն Երևանից, այլև հանրապետության տարբեր մարզերից:  Հյուրերի թվում էին  արտիստներ, երգիչներ, գրողներ, գիտնականներ, զինվորականներ, պետական-քաղաքական գործիչներ, լրագրողներ, մայրաքաղաքի մտավորականության լայն շերտերը ներկայացնողներ: Իր բացման խոսքում «Նարեկացի արվեստի միության» գործադիր տնօրեն Լևոն Իվանյանն ասաց. 

 

- Սա «Լոռու արվեստագետներ» ֆիլմաշարի հետ երկրորդ հանդիպումն է «Նարեկացի արվեստի միության» դահլիճում, թերևս կա մեր պատրաստակամությունը՝ այդ շարքից ևս մեկ ֆիլմ ցուցադրելու աշնանը: Այսօր հետաքրքիր է նրանով, որ ֆիլմը նվիրված է Լոռու մարզի մշակութային դաշտի ամենակարևոր անձերից մեկի՝ Ֆահրադ Ափուջանյանի, գործունեությանը, ով մարզի թե՛ մշակութային և թե՛ հասարակական կյանքի ամենաակտիվ մասնակիցներից է:

 

Հավատարիմ «Նարեկացի արվեստի միությունում» ձևավորված ավանդույթին՝  ստեղծագործական բեղուն գործունեության խորհրդանիշ նուռ-հուշանվեր հանձնվեց օրվա հերոս Ֆահրադ Ափուջանյանին: Նպատակն էր է՛լ ավելի հիշարժան դարձնել մեծարման ցերեկույթը: Միջոցառումը վարեց «Մովսես Խորենացի» մեդալակիր, արտիստ Ջիվան Սարգսյանը, ինչից հետո սկսվեց ֆիլմի ցուցադրությունը, որի  ստեղծագործական կազմի անդամներն են ֆիլմաշարի հեղինակ և ռեժիսոր Իվան Անտոնյանը, օպերատոր Ժորա Վարդանյանը, մոնտաժողներ Վարշամ Գևորգյանը, Էդգար Օհանյանը, լուսանկարիչ-մոնտաժող Հարություն Հովասափյանը, խմբագիր ՀՀ վաստակավոր լրագրող Ֆահրադ Ափուջանյանը: Ֆիլմում օգտագործվել է Տիգրան Մանսուրյանի երաժշտությունը:

 

Ֆիլմի ցուցադրությունից հետո իրենց տպավորությունները կիսեցին մասնակիցներից մի քանիսը: ՀՀ ժողովրդական արտիստ Ռուբեն Մաթևոսյանն իր խոսքում նշեց, որ Ֆահրադ Ափուջանյանը Լոռու մարզի և Սպիտակի շրջանի մշակութային կյանքի կազմակերպիչներից և անխոնջ մշակներից մեկն է: Նրա նախաձեռնությամբ և Սպիտակի առա¬ջին քաղաքապետ, երջանկահիշատակ Սուրեն Ավետիսյանի ղեկավարությամբ ներդրվեց «Սպիտակի պատվավոր քաղաքացի» կոչում շնորհելու ավանդույթը: Կոչմանն առաջինն արժանացել է երգիչը, որի մասին որոշումը հանձնել է Ֆահրադ Ափուջանյանը 1997թ. Ալ. Սպենդիարյանի անվան օպերայի և բալետի թատրոնի դահլիճում իր հոբելյանական երեկոյի ժամանակ:

 

- Դժվար է կյանքում Ֆահրադի նման մարդու հանդիպելը: Պարզ, համեստ, միամիտ, ազնիվ, հայրենասեր, ընկերասեր, ընտանիքասեր, երկրասեր: Զարմանալի՛, զարմանալի մարդ է Ֆահրադը,-իրեն բնորոշ անկեղծությամբ ասաց ՀՀ ժողովրդական արտիստ Երվանդ Ղազանչյանը: 

 

Իսկ Հայաստանի Ժուռնալիստների միության նախագահ Աստղիկ Գևորգյանը խոսեց Ֆ. Ափուջանյանի պրոֆեսիոնալիզմի, ակտիվ քաղաքացիական կենսադիրքորոշման, բազմանդամ համերաշխ ընտանիքի՝ կնոջ, որդիների, թոռների մասին: 

 

Շնորհակալանքի խոսք ասացին ֆիլմի հեղինակ Իվան Անտոնյանը և օրվա հերոսը՝ ՀՀ վաստակավոր լրագրող Ֆահրադ Ափուջանյանը, ով իր խոսքում մասնավորապես ասաց. 

 

- Այս պահին շատ է հուզմունքը, զգացմունքները, բայցևայնպես՝ շնորհակալանքի խոսք եմ ուզում ասել ֆիլմի ստեղծագործական խմբին «Նարեկացի արվեստի միության» ղեկավարությանը այս հնարավորությունն ընձեռելու համար: Միաժամանակ ես հպարտ եմ իմ անցած ուղու համար, որը վկայում է, այն մասին, որ ես իզուր չեմ ապրել: Այն ինչ արել եմ, չեմ ափսոսում, ափսոսում եմ չարածներիս համար: Ես հպարտ եմ, որ այս դահլիճում են ՀՀ ժողովրդական արտիստներ Երվանդ Ղազանչյանը, Ռուբեն Մաթևոսյանը, Հայաստանի ժուռնալիստների միության նախագահ Աստղիկ Գևորգյանը, ՀՀ վաստակավոր արտիստ Ռուբեն Սահակյա-նը, գեներալ-մայոր Ռաֆայել Կարապետյանը, ՀՀ ԱԺ նախկին պատգա-մավոր Վոլոդյա Բադալյա¬նը, ԽՍՀՄ նախկին ժող. պատգամավոր Նորայր Մուրադյանը և դուք՝ բոլորդ: Ֆիլմաշարի ստեղծագործական խումբը որոշել է անդրադառնալ նաև մարզից դուրս ապրող լոռեցիներին և շուտով ֆիլմեր կնկարահանվեն Ռուբեն Մաթևոսյանի, Ռազմիկ Դավոյանի, Մարինե Օթարյանի, Ռոբերտ Մաթոսյանի, Ռուբեն Սահակյանի և շատ ուրիշների մասին:  Կրկին շնորհակալ եմ:

 

 

Արմինե ՄԵԼՔՈՆՅԱՆ

Սպիտակ-Երևան