Քանի որ այս օրերին Փարիզում խաղաղության անվան տակ հավաքվել են աշխարհի ամենառազմատենչ պետությունների ղեկավարները, Միավորված ազգերի կազմակերպության գլխավոր քարտուղար Անտոնիու Գուտերեշը նրանց բացարձակ առաջատարին կոչ է արել քաղաքականության մեջ հաշվի առնել բազնակողմանիության սկզբունքի կարևորությունը: Նա հայտարարել է, թե աշխարհում այլևս չկա միակ համաշխարհային տերություն: Գուտերեշն այդ մասին խոսել է France Inter-ի եթերում:

 

- Բազմակողմանիությունը հենց ԱՄՆ-ին է անհրաժեշտ: Արդի աշխարհում այլևս չկա միակ համաշխարհային տերություն: Աշխարհը դարձել է առավել հատվածական և շատ ավելի համակշռված, քան էր 90-ականներին: ԱՄՆ-ի կողքին կան այնպիսի տերություններ, ինչպիսիք են Չինաստանը, Ռուսաստանը, Հնդկաստանը: Կան նաև տարածաշրջանային տերություններ, ինչպես Թուրքիան, Իրանը, Սաուդյան Արաբիան: Այդ պատճառով էլ բազմակողմանիությունը բոլորի շահերից է բխում,- նշել է Գուտերեշը: 

 

Նրա կարծիքով՝ հարկավոր է աշխատանքներ տանել միջազգային կառույցների բարեփոխման ուղղությամբ: ՄԱԿ-ը, ըստ կառույցի գլխավոր քարտուղարի, «պետք է ավելի մոտ դառնա ժողովուրդներին, երկխոսություն ունենա քաղաքացիական հասարակությունների հետ»:

 

Առաջին համաշխարհային պատերազմի ավարտին նվիրված միջոցառումներին մասնակցելու նպատակով Փարիզ ժամանած Գուտերեշը նաև աշխարհում տիրող իրավիճակն է քննարկել «տանտիրոջ»՝ Ֆրասիայի նախագահ Էմանուել Մակրոնի հետ: Ելնելով արդի աշխարհում տեղի ունեցող գործընթացներից՝ թերևս չարժե հույսեր փայփայել, թե Փարիզում հրապարակայնորեն հնչած խոսքերի հետևում Առաջին համաշխարհայինից ավելի կործանարար պատերազմի դավեր չեն նյութվում: