ՁԵՎԱՎՈՐԵԼ ԵՐԿՐԻ ՏԻՐՈՋ ԳԻՏԱԿՑՈՒԹՅՈՒՆԸ
- Թե´ մեր կուսակցությունը, թե´ պաշտոնական Երևանը տեսնում են ՆԱՏՕ-ի հետ համագործակցության անհրաժեշտություն, ինչը բխում է ՀՀ շահերից: Վերջ ի վերջո, Հյուսիսատլանտյան դաշինքը մի կառույց է, որի առաքելությունը Եվրոպայի անվտանգությունն ապահովելն է: Հայաստանն էլ այս կամ այն կերպ մտնում է մեծ եվրոպական տարածության մեջ` և´ արժեքային, և´ աշխարհագրական առումով: Այդ մասնակցությունը Հայաստանին բերում է նաև արտաքին քաղաքականության մեջ շահաբաժիններ,- ասում է ԱԺ «Ժառանգություն» պատգամավորական խմբակցության ղեկավար Ստեփան ՍԱՖԱՐՅԱՆԸ
Հայաստան-ՆԱՏՕ
- Հատկապես վերջին շրջանում ՆԱՏՕ-ն ոչ միայն զբաղվում է Եվրոպայի անվտանգության խնդիրներով, այլ նաև ամբողջ աշխարհում լուրջ դերակատարություն ունի:
- ՆԱՏՕ-ն ինքն իրեն հռչակել է գլոբալ ուժ` աշխարհագրական անվտանգությանը մասնակցելու առումով: Բայց նրա առաջնային գործառույթը մնում է Եվրոպայի անվտանգության ապահովումը: Ես չեմ կարծում, թե այդ դաշինքին Հայաստանի մերձեցումը կարող է հակասել Ռուսաստանի հետ մեր հարաբերություններին: Ռուսաստանն ինքը մասնակից է ՆԱՏՕ-ի բազմաթիվ գործողություններին` նպաստելով Դաշինքի առաքելությունների իրականացմանը:
- Բայց այսօր Ռուսաստան-Արևմուտք հարաբերությունները կարծես անկում են ապրում:
- Արևմուտք-Ռուսաստան հարաբերությունները միշտ էլ ունեցել են իրենց ջերմացման, սառեցման փուլերը, որոնք ժամանակավոր բնույթ են կրում: Արևմուտք-Ռուսաստան դիմակայությունը երբեք չի անցել անթույլատրելիի սահմանագիծը: Անգամ ՌԴ նախագահի ընտությանը հաջորդած «փոխհրաձգությունն» ավարտվելու է, և երկու կողմերը շարունակելու են իրենց խնդիրները լուծել «տորգերի», համաձայնությունների և հնարավոր այլ միջոցներով:
- Վեջերս Երևանում էր ՀԱՊԿ-ի գլխավոր քարտուղար Բորդյուժան: Նա մինչև Հայաստան գալը հայտարարել էր, որ պետք է հստակեցնի մեր երկրի ներքին խնդիրներում (հարկ եղած դեպքում) ՀԱՊԿ արագ արձագանքման ուժերի գործողությունները:
Հիշենք` արտակարգ դրության մասին օրենքի քննարկման ժամանակ Ձեր ղեկավարած և ՀՅԴ խմբակցությունները բացասական դիրքորոշում ունեին: Իսկ հիմա, փաստորեն, խոսվում է մեր ներքին հարցերում այլ երկրների միջամտության մասին:
- «Ժառանգությունն» էր միակ խմբակցությունը, որ նույն` արագ արձագանքման ուժերի ձևավորման վերաբերյալ ՀԱՊԿ համաձայնագրի վավերացման ժամանակ բարձրացրեց այդ խնդիրը: Իհարկե, փորձ էր արվում հիմնավորել, թե դա վերաբերում է այնպիսի դեպքերին, երբ ներքաղաքական զարգացումներն արդեն վերածվել են միջէթնիկական բախումների: Բայց Բորդյուժայի վերջին հայտարարությունները չափազանց մտահոգիչ են դարձնում այն հեռանկարը, որ ներքաղաքական զարգացումները կարող են այլ կերպ մեկնաբանվել երկրի իշխանությունների կողմից, և խնդրանք ներկայացվի ՀԱՊԿ գրասենյակ` արագ արձագանքման ուժեր ներգրավելու առումով: Շատ վտանգավոր միտումներ են:
- Դուք ասում էիք, որ Արտակարգ դրության մասին օրենքում Սահմանադրությանը հակասող կետեր կան: Այդ դեպքում ինչո՞ւ չեք դիմում Սահմանադրական դատարան` խնդիրը վիճարկելու համար:
- Լավ հարց է, բայց դրա համար պետք է ԱԺ պատգամավորների թվի առնվազն մեկ հինգերորդի` թվով 27 ստորագրություն: Ցավոք, խորհրդարանում ընդդիմությունն այսօր այդքան ձայն չունի:
Ընտրություններ
- Հաճախ է արծարծվում «Ժառանգության» և «Ազատ դեմոկրատների» հնարավոր դաշինքի հարցը: Խ. Քոքոբելյանն էլ խոստացել է համագումարից հետո հրապարակել համամասնական ցուցակը, որը չի բացառվում, որ հիշյալ երկու կուսակցությունների միասնականը լինի:
- Դեռևս շարունակվում են բանակցությունները, և կարծում եմ` մինչև մարտի 18-ը հստակ կլինի` կարողանո՞ւմ ենք ձևակերպել միասնական ցուցակ, թե՞ ոչ: Արդեն երկար ժամանակ է` «Ժառանգությունը» գտնվում է տարբեր շրջանակների հետ խորհրդատ վությունների փուլում: Միայն «Ազատ դեմոկրատները» չեն. նաև քաղաքացիական երևելի և ակնառու դեմքեր են: «Ժառանգությունն» իր առջև խնդիր է դրել էական մասնակցություն ունենալ երկրի նոր իշխանության ձևավորմանը:
- Դուք խոսեցիք քաղաքացիական շերտի մասին: Այդ առումով թույլ տվեք նկատել` ձեր կուսակցության գործունեության մեջ անցած ժամանակամիջոցում ավելի շատ նկատելի է եղել քաղաքացիական իրավունքի պաշտպանությունը :
- Դա եղել է ածանցյալ, բայց ոչ` երկրորդական: «Ժառանգությունը» խնդիր է դրել ձևավորել քաղաքացու, երկրի տիրոջ գիտակցությունը: Մենք կանգնել ենք քաղաքացիական ամենատարբեր խմբերի կողքին` զորակցելով նրանց իրավունքին: Դա եղել է մեր նախընտրական թիվ մեկ խոստումը:
- Քաղաքագետների միությունն այսօր փորձում է ձևավորել առաջիկա ընտրությունների ընթացքը վերահսկող արտակուսակցական մարմին: Դուք որքանո՞վ եք հավատում դրա կայացմանը` հաշվի առնելով, որ մինչ այժմ բոլոր կուսակցություններն առանձին -առանձին խոսել են ընտրությունների արդարության մասին, բայց վերջում շատերը բողոքել են, որ վերահսկողության հարցում իրենց ոչ ոք չի սատարել:
- Ես ողջունում եմ: Տեսնելով, թե ինչպիսի շահագրգիռ շրջանակներ են ձևավորվել ընտրությունների ազատ և արդար ընթացքը վերահսկելու համար, մի փոքր վստահ եմ զգում այն առումով, որ մենք բոլորով կկարողանանք ապահովել դա: «Ժառանգությունը» 2005-ից սկսած` ամեն ընտրական շրջանում ստեղծում է ընտրությունների ընթացքի մոնիթորինգի կենտրոն: Սրան գումարվում են ապակուսակցական շրջանակների նման նախաձեռնությունները, և կարող ենք ունենալ շատ հզոր հասարակական վերահսկողության մեխանիզմ:
- Բայց բոլոր ընտրություններից առաջ նման գործընթացներ կարծես եղել են: Մինչդեռ վերջում, կրկնում եմ, բոլորը դժգոհել են, թե իրենց քվեները տեղ չեն հասել: Ձեր լավատեսության հիմքը ո՞րն է:
- Ես համաձայն չեմ: 2009-ին «Ժառանգությունը» չէր մասնակցում Երևան քաղաքի ընտրություններին: Բայց դարձյալ ստեղծեցինք վերոհիշյալ կենտրոնը, մեր արձանագրած խախտումները տրամադրեցինք ՀԱԿ-ին, որպեսզի նա վիճարկի ՍԴ-ում:
