Ոչ կանցլերական «թուլություն»
Թվում է` ղեկավարներին ու մանավանդ` միջազգային քաղաքական կլիման ձևավորող առաջնորդներից մեկին անկեղծացնելու մասին մտածել իսկ չարժե: Բայց ահա Անգելա Մերկելը բավական անկեղծ է պատասխանել գերմանացի նշանավոր անձանց հարցերին:
Թենիսիստ Բորիս Բեքքերի` ո՞ւմ հետ նա կուզենար ընթրել հարցին ի պատասխան, կանցլերուհին ասել է.
- Երեկույթներ ես չեմ կազմակերպել, բայց մի օր հաճույքով ընթրիքի կհրավիրեի Իսպանիայի ֆուտբոլի հավաքականի մարզիչ Վինսենթե դել Բոսկեին:
Ոչ լրագրողական այդ հարցազրույցում հնչել են գերմանական սպորտի, հեռուստատեսության և արիստոկրատական վերնախավի 37 ներկայացուցիչների հարցերը (գրել է ՌԻԱ «Նովոստի»-ն):
Գերմանուհի «երկաթե լեդին» պարզվում է` ամենից շատ վախենում է ամպրոպից: Ավելի ստույգ` սարսափում է «Ամպրոպի ժամանակ առանց ծածկի լինելուց»:
- Ո՞րն է եղել ամենամեծ անձնական զոհաբերությունը` կանցլերական պաշտոնում` հանուն ժողովրդի,- հարցրել է ֆուտբոլի հավաքականի կապիտան Ֆիլիպ Լամը:
- Ես պետք է հրաժարվեմ ծպտված ձևով խանութներ հաճախելուց,- առանց ավելորդ գեղեցկախոսության անկեղծացել է Մերկելը:
Պետպաշտոնյան մինչ օրս չի մոռացել իր դեռահաս տարիների «ամենամեծ զանցանքը». Արևմտյան Գերմանիայից ուղարկված նոր մարզահագուստով մտել է ծառի խեժոտ փչակը: Իսկ սպորտով չի զբաղվել` անբավարար ունակությունների պատճառով:
Այո, հետաքրքիր է ղեկավարներին նաև շարքային մարդու կերպարով ճանաչել: Չէ՞ որ նրանք էլ հասցնում են ժամանակ գտնել` պաշտոնի բեռից գոնե մերթընդմերթ թեթևանալու: