Ձեր հոգու պես միշտ առողջ եղեք, Մաե´ստրո
ՌՈՒԲԵՆ ՄԱԹԵՎՈՍՅԱՆ. ՀՀ ժողովրդական արտիստ, Արամ Մերանգուլյանի անվան ժողգործիքների անսամբլի գեղարվեստական ղեկավար
Ծննդյան տոները նրա համար չեն, որ փաստենք, թե մի տարով էլ ծերացանք և տխրենք: Ես տխուր հաշվարկներով զբաղվելու ժամանակ չունեմ, որովհետև ոչ տանն են թողնում ծերանալ, ոչ էլ` դրսում: Հանրային ռադիոյի «15 րոպե» նորաստեղծ հաղորդաշարով Մարտին Վարդազարյանի հետ ամեն հինգշաբթի ներկայացնում եմ մեր ժամանակների մշակույթը կերտած բոլոր նվիրյալներին` Արտեմի Այվազյան, Շարա Տալյան, Արաքսի Գյուլզադյան, Գոհար Գասպարյան... Անցյալ դարի 70-ականներից մեր անսամբլին անդամագրված տաղանդավոր երաժիշտներ Միհրան Դեմիրճյանի երգաշարի և Օնիկ Գալստյանի պարային սյուիտների ձայնագրություններով հանրային ռադիոեթերի ոսկե ձայնադարանը հարստացնելու աշխատանքների ռիթմն եմ ջանում անխաթար պահել:
Կցանկանայի, որ «Ավանգարդի» յուրաքանչյուր նորընծա համարը, ինչպես եղել է 1923-ից ի վեր, լիներ առավել ուշագրավ նախորդից, որ թերթը միշտ լիներ ավանգարդիստի իր դերում, այսինքն միշտ նորարար, միշտ առաջ նայող, միշտ առաջինը: Ինչպես միշտ, տասնամյակների դավանանքին հավատարիմ, չմոռանար երիտասարդներին, ներառեր իր էջերում և ներկայացներ մեր ազգի բոլոր նորահայտ տաղանդներին: Ճիշտ այնպես, ինչպես 1962-ին, Արմեն Հովհաննիսյանի գրչով, ինձ նոր թռիչքի թևեր տվեց` գնահատելով իմ երգեցողության յուրաքանչյուր ելևէջում որպես հնչական մարգարիտ և մաղթեց, որ այդուհետ լինեի ոչ միայն հետաքրքիր, այլև շարունակեի երգչական վերընթաց գործունեություն ծավալել: Հիմա էլ հոգիս կջերմանար ինձ հասցեագրված համարժեք մաղթանքից, քանի դեռ երգս զրնգում է: