Ինչպես արդեն գրել ենք՝ եվրոպաբնակ թուրքերի մեծ մասը քվեարկել է Թուրքիայում սահմանադրական փոփոխությունների օգտին: Աշխարհի լրատվականների էջերում չթուլացող թափով շարունակվում են պնդում-քննարկումները՝ որ Թուրքիան բռնատիրության վերածվելու ճանապարհն է բռնել, իսկ նրա ղեկավար Էրդողանը անսահմանափակ իշխանություն ձեռք բերել: Հանրաքվեի քարոզարշավի ժամանակ Եվրոպական շատ երկրներ իրենց տարածքներում արգելում էին թուրք պաշտոնյաների քարոզարշավը՝ ուղղված այնտեղ բնակվող այն թուրքերին, ովքեր Թուրքիայում ընտրելու իրավունք ունեն:

 

Ժողովրդավարությունը իր համար դրոշակ դարձրած Եվրոպան, հասկանալի է՝ դեմ էր Թուրքիայում դրա նահանջի հեռանկարին: Իսկ հիմա պարզվում է, որ այդ ժողովրդավարության գրկում իրենց համար հանգիստ ապրող թուրքերը կողմ են քվեարկել բուն Թուրքիայում ազգայնականություն ու բռնատիրություն հաստատմանը: Ընդ որում՝ թվերը շատ խոսուն են: Այսպես, Բելգիայում սահմանադրական փոփոխություններին կողմ է քվեարկել տեղի թուրքերի 77 տոկոսը, Ավստրիայում՝ 73, Նիդերլանդներում՝ 70, Ֆրանսիայում՝ 65, Գերմանիայում՝ 63, Դանիայում՝ 60 տոկոսը։

 

Բարեբախտաբար՝ «ոչ»-ի հաղթանակներ էլ են եղել. Իսպանիայում՝ 86 տոկոս, իսկ Բրիտանիայում 79։

 

Այս երևույթի առաջին արձագանքներն արդեն հնչում են: Բելգիայի խորհրդարանում, օրինակ, առաջարկել են երկքաղաքացիությունից զրկել բոլոր այն թուրքերին, ովքեր Թուրքիայում ընտրելու օրավունք ունեն: Եվրոպացիներն այսպես են մտածում՝ եթե ձեզ  բռնատիրական պետությունն է դուր գալիս՝ գնացեք ու հենց այնտեղ էլ բնակվեք: