Փորձություն՝ Յուրի Խաչատուրովի համար
ԱԴՐԲԵՋԱՆԸ ԽՈՒՃԱՊ Է ՏԱՐԱԾՈՒՄ
Մի քանի օր առաջ տեղեկատվություն տարածվեց, որ ՀԱՊԿ-ի անդամ Ղազախստանը բանակցում է Ադրբեջանի հետ՝ նրան վերջին մոդելի զրահապատ մեքենա վաճառելու համար: Բաքուն, առաջ ընկնելով, ոգևորված հայտարարեց, որ բանակցություններն ավարտվել են, և շուտով զենքը կգնեն: Մինչդեռ Ղազախստանն ասաց, թե բանակցությունները դեռ շարունակվում են:
ՀԱՊԿ-ի խնդիրներից մեկը անդամ-երկրների տարածքային-տնտեսական տարածությունը ցանկացած արտաքին ռազմաքաղաքական ագրեսորներից պաշտպանելն է՝ բանակների և օժանդակ ստորաբաժանումների համատեղ ջանքերով: Մինչդեռ Ղազախստանի այս քայլը ճիշտ հակառակ նշանակետի է խփում: Սա պատահական չէ, քանի որ թշնամուն զենք վաճառելու նախակարապետը մեր դաշնակից, ՀԱՊԿ անդամ, իսկ իրականում դրա ստվերային ղեկավար Ռուսաստանն է: Ադրբեջանին զենք վաճառելու թեման սրվեց ապրիլյան պատերազմից հետո: ՌԴ փոխվարչապետ Ռոգոզինի ցինիկ ու լկտի հայտարարությունը չուշացավ՝ դա ընդամենը բիզնես է, որը շարունակվելու է: Եթե իրենք չվաճառեն՝ կվաճառի այլ պետություն. ահա սա է մեզ դաշնակից ներկայացող Ռուսաստանը: Եվ ռազմավարական գործընկերոջ այս պահվածքն ու նոստրադամուսական կանխատեսումն իրականացավ: Հերթը հասավ Ղազախստանին: ՈՒ չպետք է զարմանանք, եթե որոշ ժամանակ անց պարզվի, որ ՀԱՊԿ անդամ բոլոր երկրները զենք են վաճառում Ադրբեջանին: Բիիիիզնես է:
Ադրբեջանի այս հայտարարությունը նաև քարոզչական նպատակ ունի՝ վախեցնել հայ հանրությանը, խուճապ տարածել, հասկացնել, թե սպավելիք պատերազմում պարտվելու ենք: Բաքվի հաշվարկները զուր են, քանի որ Արցախյան գոյամարտից տարիներ հետո ապրիլյան քառօրյա պատերազմը հակառակը ցույց տվեց: Ավելին՝ Բաքվի այս քայլն ավելի զգոն է դարձնում Հայաստանին:
Արդ, ո՞րն է մեր անելիքը: Այս գործընթացն առաջին հերթին փորձություն է ՀԱՊԿ-ի գլխավոր նորանշանակ քարտուղար Յուրի Խաչատուրովի համար: Առաջին փորձությունը: Կկարողանա՞ նա սրա դեմն առնել, թույլ չտալ գործարքի կայացումը...
Հասկանալի է, որ նա չի կարող վերազգային կառույցում առաջ տանել հայ ժողովրդի շահերը, բայց միայն հղում տալով ՀԱՊԿ-ի որդեգրած քաղաքականությանը, ՀՀ դիվանագիտության հետ աշխատելով՝ հնարավոր է սայլը տեղից շարժել: Ի վերջո, ամեն ինչ չէ, որ նավթով ու խավիարով է որոշվում: Բացի այդ, խնդիրը բարձրաձայնելն ու այս կարգի զինավաճառությունը դադարեցնելու պահնջները չեն կարող անհետևանք մնալ: