Երբ աշխարհահռչակ սոպրանո Մոնսերատ Կաբալիեին հարցել են՝ Արցախում համերգ տալու համար Ադրբեջան ձեր մուտքն արգելվել է, ի՞նչ եք անելու, նա պատասխանում է, թե ինքն ամբողջ կյանքն ապրել է առանց այդ երկիրը ոտք դնելու և դրա կարիքը չունի:Այսպիսի մտածողությունն էլ է կաթիլ, որը կարող է Ադրբեջանի իշխանությունների սնապարծության ու ինքնասիրահարվածության քարը ծակել: Եվ ինչքան շուտ, այնքան լավ թե՛ իրենց, թե՛ աշխարհի համար:
 

Ադրբեջանական «սև ցուցակի» հունձքն այս տարի առատ է: Կատակ չէ՝ Արցախում տեղի ունեցած հանրաքվեի ժամանակ միջազգային դիտորդներ են ներկա եղել, իսկ բլոգեր Լապշինի կալանավորմանն ի պատասխան երեք տասնյակ լրագրողներ այնտեղ համաժողով են գումարել, բազմաթիվ հրապարակումներ արել: Եվ քանի որ նրանցից ոչ մեկն այնքան «քաղաքական հասունություն» չի ունեցել, որպեսզի Ադրբեջանից թույլտվություն վերցնի ու նոր միայն այցելի նրա վերահսկողությունից դուրս գտնվող երկրամասը:

«Տերը» շա˜տ է բարկացել: Ու որպես ցասումի արտահայտություն՝ բոլորին սև ցուցակ է գցել:

Լրատվամիջոցները երեկ տեղեկացրել են, որ Ադրբեջանի փայփայած «սև ցուցակը» թարմացվել է և 50 էջ ծավալով հրապարակվել: 668 մարդ է ընդգրկվել նոր ցուցակում, որի «պատվավոր» 21-րդ հորիզոնականը նույն Ալեքսանդր Լապշինն է զբաղեցնում:

Ադրբեջանի «սև ցուցակում» ամենաշատը ՌԴ քաղաքացիներ են՝ 162, գերմանացիներից 61-ն է այդ բախտին արժանացել, իտալացիներից՝ 47-ը, ԱՄՆ քաղաքացիներից՝ 44-ը, ֆրանսիացիներից՝ 40-ը:

Երևում է՝ Ադրբեջանի իշխանությունները մի ասացվածք լավ են սովորել՝ կաթիլը քար է ծակում: Մտածում են՝ իրենց ցուցակները թարմացնելով ու վերահրատարակելով՝ կամ մարդկանց կստիպեն իրենց հետ հաշվի նստել, կամ թույլ չեն տա, որ Արցախ այցելելով՝ ճանաչեն ու սիրեն: Բայց մոռանում են, որ ամեն մեդալ երկու երես է ունենում:

Երևում է՝ իրենք Ադրբեջանը Ավետյաց երկրի տեղ են դրել ու մտածում են, թե մահկանացուի համար ի՞նչը կարող է ավելի երանելի լինել, քան այնտեղ այցելելը: Մինչդեռ «սև ցուցակի» դեմքերից շատերն իրենց անունը տեսնելով՝ արհամարհանքով ժպտում են: