Քոչարյանին կալանքից փրկելու անվան տակ ՀՀԿ-դաշնակցական անսուրբ կոալիցիան այս ու այն կողմից երկչոտ ու պատեհապաշտ անհատների ուղեկցությամբ գլուխ են բարձրացրել իրենց հակազգային թալանչական սև գործը շարունակելու համար:

 

Սակայն պատասխանատվության և արդարության վերականգման ժամը հասել է. հեղափոխական ընթացքը հնարավոր չի կանգնեցնել, և ոչ մի այսպես կոչված անձեռնմխելի անձ չի կարող խուսափել արդարադատությունից:

 

Հակառակ Քոչարյանի տասը տարիների տեռորին, սարսափի, թունավորված ու անազատ մթնոլորտին, նա այսօր, ինչպես ՀՀ բոլոր քաղաքացիները, հնարավորություն ունի ոչ միայն իր իրավապաշտպանների միջոցով ողջ մամուլի անկաշկանդ ներկայությամբ պաշտպանվելու և իր խոսքն ասելու, այլև օգտվում է հարցը իրավական հարթակից քաղաքական հնարովի ու շինծու հարթակ փոխադրելու բոլոր թույլատրելի և ոչ թույլատրելի հնարավորություններից:

 

Եվրոպայի Հայերի Համագումարը, պաշտպանելով յուրաքանչյուր անհատի ու ամբաստանյալի քաղաքացիական լիարժեք պաշտպանությունը և իրավունքները, միևնույն ժամանակ խստիվ դատապարտում է երիտասարդ ու անկաշառ ներկա իշխանությունների նկատմամբ ՀՀԿ-դաշնակցական օտարամոլների գրոհը և շանտաժը:

 

ՀՀԿ-ականները և նրանց հովանավոր արտաքին ուժերը ըստ էության ներքուստ  երախտապարտ պիտի լինեն, որ հեղափոխության առաջնորդները նրանց մինչ այսօր փրկել են ժողովրդական ցասումից ու վրեժխնդրություններից…

 

Զգոնության կոչ ենք անում ՀՀԿ-ական և նրանց սատարող բոլոր այն ուժերին, ովքեր չարաշահելով իրենց այսօրվա նվեր ստացած խորհրդարանական աթոռները, օտար ուժերին և միջազգային ատյաններին դիմելու սպառնալիքներով, պատրաստ են  արդարադատությունից խուսափելու համար դիմել ամեն մի ստոր քայլի:

 

Սփյուռքը, ի խնդիր ինքնիշխան պետականության, իր ճնշող մեծամասնությամբ զորակցել ու զորակցում է նոր փոփոխությունների այս հեղափոխական շարժմանը և չի հանդուրժելու ազգային դավաճանության ոչ մի նոր քայլ:

 

ՀՀԿ-ին մնում է այս վերջին պահին պատվով նահանջ և ինքնալուծարում, իսկ հարյուրամյա հեղափոխական կուսակցության վերնախավին՝ նեղ գրպանային շահերի փոխարեն՝ նվազագույնը ինքնամաքրվում:

 

Եվրոպայի Հայերի Համագումար