ԱՄՆ Կոնգրեսի Թոմ Լանթոսի անվան մարդու իրավունքների հանձնաժողովում հունիսի 21-ին տեղի ունեցան Արցախի հայերի պաշտպանության հարցով լսումներ, որոնց կազմակերպման հարցում կարևոր դեր խաղաց ԱՄՆ-ում Բևեռի լոբբիստական աշխատանքը՝ կոնգրեսական Սմիթի և նրա գրասենյակի հետ ունեցած սերտ գործակցությամբ:

 

Լսումների ընթացքում կոնգրեսականներն ամենակոշտ ձևով քննադատեցին Ադրբեջանի և Թուրքիայի ցեղասպանական քաղաքականությունը հայերի նկատմամբ՝ առաջարկելով քայլեր ձեռնարկել այդ ամենի դեմն առնելու համար:

 

Իրենց ելույթներում ԱՄՆ օրեսդիրները լուրջ մտահոգություն հայտեցին Արցախում տիրող իրավիճակի վերաբերյալ, առաջարկեցին դադարեցնել Ադրբեջանին տրվող օգնությունը, գործի դնել պատժամիջոցների մեխանիզմը, այդ երկրի նկատմամբ կիրառել 907 բանաձևը:

 

Միաժամանակ շեշտվեց, որ պետք է հրատապ կարգով օգնել Արցախին եւ այնտեղ ապրող հայերին ու շտապ քայլեր ձեռնարկել միջանցքը բացելու ուղղությամբ:

 

Կոնգրեսականներն իրենց ելույթներում թիրախավորեցին ոչ միայն Ալիևին, այլ վերջինիս հովանավորող Էրդողանին՝ նրանց երկուսին համարելով արյունակից եղբայրներ, որոնց տեղը մեղադրյալի աթոռն է:

 

Հայ ժողովրդի և արցախահայության ճակատագրով անհանգստացած կոնգրեսականները Ալիևյան ռեժիմի վայրագությունների վերաբերյալ տարբեր վկայություններ ու փաստեր ունեն իրենց ձեռքի տակ, որոնք հետագայում դառնալու են ԱՄՆ-ի պաշտոնական արձանագրության մաս:

 

Ազգային-ժողովրդավարական Բևեռը Livingston Group-ի հետ սերտ և ջերմ գործակցությամբ շարունակում է իր լոբբիստական գործունեությունը ԱՄՆ-ում՝ ամենաբարձր օղակներում ներկայացնելով Արցախում ստեղծված ծանր իրավիճակն ու կարևորելով հրատապ քայլերի կիրառման անհրաժեշտությունը:

 

 

Ազգային-ժողովրդավարական Բևեռի մամուլի ծառայություն